Hapoh ka 15 tarik u Kyllalyngkot ai por ka KJDSTA ïa ka sorkar ban pynurlong ïa ki jingdawa

Shillong, Nohprah 15: Ka Khasi Jaiñtia Deficit School Teachers’ Association (KJDSTA) ka la dawa ïa ka Sorkar Jylla ba kan pynkiew noh ïa ka Dearness Allowance (DA) jong ki nonghikai skul deficit sha ka 51%, ka ban ïahap kat kum ka jingsiew ïa ki nongtrei Sorkar, nalor ban pynlait noh ïa ki arrear bad ka jingialang ka la shim ruh ia ka rai ban ai por ia ka sorkar ba kan pynurlong noh ia baroh ki jingdawa hapoh ka 15 tarik jong u bnai Kyllalyngkot jong u snem 2026.
Ïa kane ka rai na ka seng ka seng ka la shim ha ka jingïalang jong ka seng ba long ha madan Malki ha ka sngi Nyngkong ha kaba da ki spah ngut ki nonghikai ki la wan ban ïashim bynta.
Lyngba ka shithi ba la phah sha u Myntri Rangbah ka Jylla Conrad K Sangma, u President ka KJSTA Bah Boswell S Pala ula pynpaw ba da ki hajar ngut ki nonghikai deficit ki la mad ïa ka jingeh kaba jur ha ka liang ka pisa tyngka bad ha ka bor pyrkhat pyrdaiñ namar ka jingsahkut sah hajuh ka jingsiew jong ka DA ba long 43%.
U President ha ka jingïalang u la ong, “Ngi dawa jur ïa ka Sorkar ba kan leh eiei bad rai mardor ha ka ban pynkiew ïa ka DA jong ki nonghikai deficit ka ban long katjuh bad ki nongtrei Sorkar bad ban pynlait noh ïa ki arrear jong ka DA ba pynkiew ha ki snem ba la dep.” Ha kane ka jingïalang na ka liang ka seng ka la ai por ïa ka Sorkar haduh ka 15 tarik Kyllalyngkot 2026 ba kan pynurlong ïa ki jingdawa, haba byrngem ban pynlong ïa ka jingïakhih lada kam urlong.
Ka KJDSTA ka la kyrpad ruh ïa u Myntri Rangbah ba un tuklar halor ki katto katne ki kam ba kyrkieh kynthup ka jingpyntreikam ïa ka Centralized Provident Fund System, pynlait ïa ka Death-cum-Retirement Gratuity (DCRG) sha ki nonghikai ba la shongthait bad ban pynthikna ïa ka MEGH-SIMS portal ka bym don jingbakla.
Lah ban ong ba ka Sorkar Meghalaya dang shen ka la pynbna ban pynkiew 2% ka DA sha ki nongtrei, kaba kyntiew ïa ka jingsiew sha ka 51%, ka ban treikam naduh ka 1 tarik Naitung 2025.
Hynrei, ki nonghikai deficit ki dang ïai bteng ban ïoh tang 43% ka DA, kaba la pynbor ïa ki ban pyrshah bad dawa ïa kajuh ka jingsiew. Ha kane ka jingïalang ki la pynpaw ruh ba lada ka sorkar kam sngap ïa ki jingdawa jong ki nonghikai ki la long kiba la khreh ban pynlong shuh shuh kiwei pat ki jingïakhih ban pynbor ïa ka sorkar halor kane ka mat kaba ki la buh.