Hapoh 5 snem ïoh kurup drok ki pulit ba shongdor haduh 400 klur tyngka kem 1061 ngut

Shillong Nailar 22: Ha ka jingïakhun pyrshah ïa ki jingdih kiba sniew ki pulit ka jylla kila ïoh kurup ïa u droks uba shongdor palat 400 Klur tyngka bad ïoh kem ruh haduh 1061 ngut ki riewshimet kiba donkti ha ka ban khaïi be-aiñ ha kine ki 5 snem kiba la dep.
“Ka jingïoh kurup baroh ka shongdor palat ia ka 412 Klur tyngka, ïa kaba haduh mynta ngi lah dep ban thang noh shiteng hapoh ka karkhana jongka Star Cement ha East Jaintia Hills. 1061 ngut ki briew kila shah kem ha kine ki 5 snem kiba la dep” la ong u Superintendent of Police (SP) jongka Anti-Narcotic Task Force (ANTF) u Giri Prasad haba ïakren bad ki nongthoh khubor ha ka sngi Palei.
Ki jingdih pynbuaid kiba la ïoh kurup ki kynthup 41,000 gram u Heroin, 12716 Kg u Ganja, 2 kg u Opium, 76 kg ki Yaba Tablets, 14 kg u Crystal Meth, 16 kg kiwei pat ki jingdih pynbuaid, 1.74 lak bilor ka Codeine Cough Syrup kiba la ïoh kurup hapoh ka jylla.
U Prasad ula pynpaw ba kala don ka jingkiew ha ki jingjia jongka jingkhaïi ïa u droks ha ka jylla naduh u snem 2023 haduh u 2025 bad la jan don kumba 100 ngut kiba la shah kem tang mynta u snem.
Katkum ka jingong u SP ka ANTF, ki don ar jait ki rukom khaïi, ka jingdie sha ki nongdih da kaba khring ïa ki samla ka jylla bad ka jingkhaïi na kawei ka jylla sha kawei pat, ïa kaba la khaïi ïa u droks lyngba ka jylla sha kiwei pat ki jylla.
Ula phla ba dei namar ka jingpynjur ïa ka jingkhynra bad jingkhmih bniah, kila don katto katne ki nongkhaïi kiba la sdang wad da kiwei pat ki lad ki lynti ban ïoh khaïi sha kiwei pat ki jylla.
“Kitei ki jait jingjia kila nang kiew bad ngi la lah ban long kiba seisoh ha kitei ki jingkurup ha kine ki khyndiat snem” la ong u Prasad.
Ka ANTF kala pynleit jingmut bha ha ki jaka rung bad ki jaka mih (entry & exit point), khamtam ha Ri Bhoi bad East Jaintia Hills districts, ha kaba bun bah u droks la khaïi shapoh ka jylla.
“Kila don ki district ANTF ha man la ki district hynrei ha Ri Bhoi bad East Jaintia namar ba kidei ki jaka rung bad jaka mih na ka bynta ka surok bah, kumta ka long kaba don jingma na ka jingkhaïi ïa u droks. Ngi lah ïatreilang ryngkat bad ki ANTF ha ki district bapher. Lada phi peit ïa ka jingïoh kurup ha kine ki por kiba khyndiat, ngi lah pynleit jingmut ha ki jaka rung bad jaka mih namar ba ka jingkurup u droks ha kitei ki district kala jur bha” ong u Prasad.
Ula bynrap ba dang shen la ïoh kurup ïa ki jingdih kiba sniew kiba shongdor 4 Klur tygnka tang ha ka shi sngi, kadei lyngba ka jingkhynra kaba la pynlong hapdeng ka ANTF bad ki pulit jongka East Jaintia Hills district.
Ka ANTF ka dang khmih lynti ban ïoh noh ïa ka K9 Unit ha u Naiwieng bad kane kan kyntiew shuh shuh ïa ka jinglah ka jongki ban lap ia ki jingdih pynbuaid.