Nongstoiñ, Jymmang, 7: Hapoh 48 kynta ba jia ka jingshah shoh jong uwei u rangbah ha Lad stand Civil Nongstoiñ, ki pulit ka West Khasi Hills da ka jingtrei shitom jong ka kynhun ba kyrpang ka ANTF, ki la ïoh ban kem noh ïa u Johnnystar Kharbani u ba shong ba sah ha ka shnong Mawkhlam Nongpyndeng, u ba dei u snar doh drok ba la satar bha, ong ki pulit.
Katkum ka khubor na ki heh pulit ka District la ïathuh ba ka jingïoh kem ka dei hadien ka jingsuba bad jingïai thwet ïa utei u runar, naduh ka sngi ba jia ka jingshah shoh jong u Shaibandon Nongrim. Kumta ha ka jingïai thwet, hynnin janmiet ki pulit ki la ïoh kem ïa u Johnnystar Kharbani na nongbah Shillong ha ki bynta jong ka thaiñ Polo.
Lah ban pynkynmaw hangne ba ha ka janmiet 4 tarik, u Bah Shaibandon Nongrim u ba buh dukan hajan lad stand civil, u la shah bom shah shoh da u lyngka ha u Johnnystar haduh ba un da mynsaw jur bad don hapdeng ka jingbym tip briew haduh mynta. Ki heh pulit ki la kren shai ba ka jingnud jong utei u runar ban leh ïa kane ka kam ba shyrkhei, ka dei namar ka daw jong u drok. U la leit khnang ha katei ka dukan ruh da ka jingthmu ban tuh ban lute.
Na ka liang ki pulit ki dang phah ïa utei u runar sha Judicial Custody bad yn tohkit bniah ruh ïa u. Kumjuh ruh na ka liang ki heh pulit ka District, ki la pynpaw ka jingai khublei sha ki paidbah bad ki Village Defence Party, kiba la ïatreilang shisha ha kine ki khyndiat kynta ban thwet bad ïoh kem noh ïa utei u runar.
