Hapoh 3 sngi ai por ban pynkhuid ïa ki ñiut ba sahkut ha Ïawmusiang

Jowai, Ïaïong 19: Ka jingsah kut ki ñiut kaba la kynjoh la ar bnai mynta ha sor Jowai kala buh pynban ha ka jingma ïa ki paidbah nongshong shnong khamtam ha ka liang ka koit ka khiah namar ka jingsma iwtung ba shyrkhei kaba mih na kitei ki ñiut ba la lumthup shi jaka.
Ki bynta ba jur eh ka jinglum thup ïa ki ñiut ka dei ha hajan ka DC Ophis, ha surok Thomas Jones Synod College, ha Ïawthymme, ha surok ïaid kjat hajan ka H.K. Singh Secondary School. La sakhi ruh ba ka jingbret pathar ïa ki ñiut kala jur bha sha kylleng sawdong ki bynta ba long riat kiba lah ban ktah ruh wat ïa ka Wah Myntdu ka nongbsa umbam.
Da ka jingsngewkhia halor kane ka jingsah kut jong ki ñiut ha Ïawmusiang naduh ka 4 tarik u Rymphang 2022 khlem da don shuh kiba ïohi, na ka liang ka Dorbar Shnong Tympang Ïawmusiang, Jowai mynta ka sngi 19 tarik hapoh ka jingïalam u ma Ajoy K Lywait uba dei u Waheh Shnong ba thymmai, ha ryngkat ki dkhot bad ki paidbah ka shnong kila leit ban ïa kynduh markhmat ïa u Deputy Commissioner West Jaiñtia Hills District bah Garod L.S.N. Dykes, (IAS) ha ophis treikam jong u ban dawa jur pynkhuid noh ïa kitei ki ñiut hapoh lai (3) sngi naduh mynta ka sngi ba la aiti ïa ka dorkhas lym kumta ka shnong kan sa leh ïa kaba donkam.
U ma Ajoy K Lywait ula kren shai lada kitei ki ñiut ki dang neh sah kumjuh hadien katei ka lai sngi ba la buh por, ka shnong kam banse ban khot syndon da ka ‘jingpakhang shnong hapoh ka Dorbar Shnong Tympang Ïawmusiang baroh kawei’, kaba khang pyrshah ruh ïa ka ïaid ka ïeng jong ki kali ki mator.
Shuh shuh utei u Waheh Shnong ula ong ba kane ka jingeh na ka jingsah ki ñiut ha sor Jowai khlem da don shuh ki nongpeit kala buh ha ka jinglyngngoh ïa ki paidbah nongshong shnong jong ka Ri-Lum Jaiñtia baroh kawei namar ka Jowai ka dei ka Head Quarter jong ka West Jaiñtia bad ka dei ruh kum ka ïit khmih.
Katkum kane ka dorkhas ba la aiti ha ka DC la pynsngew ïa ka jingeh jong kiba bun ba lang naduh ki nongshong ïew, ki khynnah skul, ki nongtrei na kylleng ki tnad ophis bapher bapher kiba la hap ban ïaid lynti lyngba kitei ki ñiut kiba sma iwtung.
La sakhi ruh kane ka jinglum thup ïa ki ñiut ha Ïawmusiang ka pynlong ïa ki dukam ba marjan ban khang khyrdep namar ba kim lah shuh ban shah ïa katei ka jingsma nalor ka jingbun ki skaiñ. Shuh shuh kane kala wanrah ruh ïa ka jingthuh ha ka leit ka wan jong ki kali namar ka jingbun palat jong ki ñiut kiba la jan tap lut ïa ka surok.
Ka Dorbar Shnong ha ka juh ka por ka kyntu jur ïa ki paidbah nongshong shnong ba kin long kiba lehkhuid dalade hi, kata ym ban bret pathar ïa ki ñiut kat shaba lap bad ki dei ruh ban nang ban pynbynta ïa ki ñiut na kiba pyut bad ki bym pyut, ka shnong na ka por sha ka por kaba ju pynlong ki prokram ai jinghikai bad ka jingpynkhuid shnong/ïew ban wanrah ïa ka khuid ka suba.
Kum ban shu pynkynmaw ka ba ïing bishar ba don burom jong ka Meghalaya High Court kala dep ban bthah ïa ka JHADC bad JMB ha ka 12.04.2022 ban leit kit ïa ki ñiut na kylleng ka sor Jowai bad ïa kane yn sa shong bishar biang lashai ka sngi 20 tarik u Ïaïong, 2022.