Hapoh 3 bnaikum u Administrator, ngin shong pyrkhat bad ki nongïalam ban pynbeit ïa ki kam ka Hima

Nongpoh, Naitung 09: Hadien ka kynrum kynram kaba la mih bad ka jingshah sospon noh u Bah Wanphrang Syiem Nongshai kum u Sirdar ka Elaka Nongpoh Sirdarship, bala shim bujli pat da u Bah A Basaiawmoit Deputy Secretary ka KHADC kum u nongpeit nongkhmih (Administrator) ba shipor katba ym pat lah ban pynbeit bad ban thung da u sirdar ba pura, u Bah A Basaiawmoit kum u Administrator mynta ka sngi u la hiar sha Nongpoh ban ïakynduh bad ki nongïalam ka Hima bad ki nongsynshar Raid ha Pahamsyiem bad ïa mir jingmut bad ban pyntyllun ïa ki kam ki jam ban nang pynbha bad pynbeit ïa ki kam ka Hima.
Kum ban shu kdew hangne ba kane ka jingshim rai ka KHADC ban thung noh da u Administrator ban peit ïa kane ka Elaka Nongpoh Sirdarship, ka dei hadien ba la don ki nongïalam Raid kiba la ujor sha ka High Court pyrshah ïa u Bah Wanphrang Syiem Nongshai kum u Sirdar ka Elaka Nongpoh Sirdarship bad na ka liang ka High Court ka la pynmih ïa ka hukum ba hapoh ka 3 bnai dei ban buh da ka Referendum, khnang ban lah ban pynbeit ïa ki kynrum ki kynram hapoh kane ka Elaka Nongpoh Sirdarship.
Ha katei ka jingwan kynduh ïa ki nongïalam Hima bad ki nongsynshar Raid na ka liang u Bah A Basaiawmoit u la ioh ruh ban aiti kumba 50 tylli ki shuki ryngkat kawei ka duli ba kin ioh pyndonkam namar ka ophis jong ka Hima ka dang long thylli wat tang ka jaka buh kot ruh kim pat don satia.
Haba kren ha katei ka sngi na ka liang u Bah A Basaiawmoit kum u Administrator u la ong ba kane ka jingaiti jong u da ki shuki bad ka duli ka dei ka sienjam ba nyngkong ba ki khlieh nongsynshar kin ioh ban pyndonkam bad ban pyniaid beit ïa ki kam ki jam jong ka Hima.
U la ong ruh ba ha kine ki 3 bnai bala bynshet ha u ban shimti ïa ka kam kum u nongpeit nongkhmih un sa shimkhia ban ïatreilang bad ki nongïalam ka Hima bad ki nongsynshar Raid ban pynbeit ïa ki jingeh bad ki kynrum ki kynram hapoh ka Hima.