Shillong, Naitung 26: Ka madan Umlyngka ha ki lai bnai ban wan kan sa kylla long ka madan ïalehkai ka ba nyngkong eh ha ka thaiñ Mylliem ban ïoh siang da u phlang im ba paka katkum ka juk stad mynta.
Ïa kane la ïathuh da u kontraktor ba pyntrei ïa katei ka madan ha ka jingjurip jong u Chief Adviser jong u Myntri Rangbah ka Jylla- u Bah Hamlet Dohling ryngkat ki Rangbah Shnong na ka thaiñ Umlyngka, nangta u engineer na ka tnad sports nalor ki nongïalam ka Sports Club ha ka step sngi Thohdieng.
Ha kane ka step ki nongïalam ka sports club kumjuh ki Rangbah Shnong ki la pynpaw ba ki kwah ban ïohi ba katei ka madan kan dep noh kham kloi khnang ba ki heprit bad ki samla kin ïoh ban ïalehkai bad ba kin ym ngop ha kiwei pat ki jingpynbyrngïa.
“Ka kham shim por khyndiat namar ngi hap ban ap haduh ban da poi ka Lyiur ba ngin ïoh thung ïa une u phlang ba un skhem bad un im. Kumta, ban thung ïa u la kumno kumno hapoh lai bnai la dep baroh kawei ka madan,” ong u kontraktor.
Katba na ka lïang u Bah Hamlet ba dei ruh u MLA barim ka Mylliem u la ong ba kum u nongmihkmat ha ki snem ba la dep u la ïakhun borbah ban pynïoh ïa katei ka projek kaba 5 klur duna kumta u khmihlynti ba ka jingtei ïa ka Indoor Stadium bad ïa ka madan kan dep noh ha ka por kaba bïang.
“Ka jingwan jongnga mynta ka sngi ka long ban peit ïa ka jingpyntrei ïa kane ka madan bad ruh ïa ka Stadium khamtam eh ban rai ba da u phlang ba kumno ngin thung hangne,” ong u Bah Hamlet.
Shuh shuh u ong ba ka jingwanrah ïa kane ka skim ka long na bynta ka shnong bad ka thaiñ baroh kawei. U kyntu ruh ïa ka shnong ïa ka sports club ba kin bteng ban ai ka jingïatreilang bad ka department kumjuh bad kontraktor khnang ba ka jingtrei kan long kaba paka bad ban ïoh pyndep nadong shadong ha ka por kaba bïang.
“Ka long kaba sngewtynnad ba kane ka madan ka long kaba nyngkong tam ban ïoh siang da u phlang im bad nga kular ban ïai bteng treilang na bynta ka roi ka par bad ka jingdonkam ha shnong ha thaw baroh kawei,” u la bynrap bïang.
Shuh shuh u la ïathuh ba ha Nongkseh la ïoh biang 2.10 klur tyngka na bynta ka madan bad ka jaka shong peitkai (gallery) ki paidbah. U ong ba kane ka urlong namar ka jingtreilang jong ka shnong bad ki paidbah.
U Bah Hamlet u ïathuh ruh ba ïa ka Indoor Stadium ha Lummawbah kin sa ïoh ban plie noh ha u Nailar – Nailur mynta u snem katba ïa ka Stadium ba 8 klur ha Lawsohtun ka kam ka la ïaid mynta 40 persen. U pynpaw ruh ka jingkmen ban ïohi ba ki kam kiba u wanrah kum u nongmihkhmat ha kato ka por, mynta ki la ïaid shaid shaid.
Une u MLA barim ka Mylliem u ong ruh ba ka thaiñ Umlyngka kadei kaba ju sei ïa ki khlur ïalehkai kiba kynsai bha bad kumta u kyrmen ba ynda la dep kane ka madan ki samla kin ïoh ban kilan met bha bad sei shuh shuh ki nongïalehkai kiba tbit ban mihkhmat ïa ka thain, ïa ka jylla bad ka ri hi baroh kawei.
