Hapoh 2 snem thmu ban kyntiew ïa ki nongjngi ka Jylla ban aireng ha ki National Level

Shillong, Naitung 25: Hynñiew snem mynshwa ka True North Leisure Centre ka la seng ïa ka nongrim na ka bynta kaei kaba ka kam jngi ka lah ban long bad ka dei ban long ha Meghalaya, ha kaba ka jinglong ka suiñbneng bunsien ka khanglad ïa ka kam jngi shabar, hynrei da ka jingdon jong ka pung jngi jong ka Mission Compound, ka la ailad ïa ka jinghikai bad jingïakop jngi ba kin ïaid shakhmat baroh shisnem khlem jingpynthut.
Mynta, ki nongseng kiba don shadien jong kane ka sienjam ki la rah ïa ka kam jngi sha kawei pat ka kyrdan da ka jaka thymmai jong ka ha Lapalang, kaba kham heh bad kaba dap da ki jingdonkam. ïa kane ka jaka la plie paidbah da u Myntri rangbah ka jylla u Conrad K Sangma ha ka jan miet jong ka sngi Thohdieng.
Kane ka jaka ka don ïa ka pung kaba heh 25 mitar, kaba jylliew naduh 3 haduh 6 phut, kaba kynthup ïa ka pung ai jinghikai bad ka pung jngi na ka bynta ki khynnah. Ka don ruh ka jaka kilanmet, kaba la biang nadong shadon ki jingdonkam, ka kamra pynsyaid (steam room) bad ka jaka sum (hot tub).
“Nga la jan klet ba Nga don ha Shillong haba rung ha kane ka jaka,” la ong u Myntri Rangbah ka Jylla. “Ka jait jingbha, ka jingdonkam bad ka jingshna ha ka rukom kaba bñiah bad ka jingbha jong ki jingtei ka pyni ïa ka jingsngewtynnat ïa ka kam jong ka kynhun kaba pynïaid ïa kane ka projek. Ka long ka nuksa kaba khraw ïa kaei kaba Ngi lah ban ïoh lada Ngi buh ïa ka dohnud bad ka mynsiem jong Ngi ha kaei kaba ngi ngeit.”
Kawei na ki mat ba kongsan na ka bynta kane ka jaka ha Lapalang ka long ban pynïar ïa ka jaka hikai jngi jong ka True North.
“Phi lah ban pynkylla ïa ki jingim lyngba kane ka jaka. Phi don ka jingkitkhlieh kaba khraw ha ka ban saiñdur ïa ka jingim jong ki samla nongjngi. Ngi ha ka Sorkar Ngi kloi ban ïarap ïa kane ban long ka jaka kaba bha tam ha ka jylla Meghalaya bad ka thaiñ shatei lammihngi,” la ong u Myntri Rangbah, da kaba bynrap ba ka True North ka lah ban don ka bynta kaba kongsan ban ïarap ïa ka Meghalaya ban pynurlong ïa ki jingthmu jong ka ha ka National Games bad ban pynmih ïa u nongïalehkai Meghalaya sha ka Olympic ka ban sa wan.
Ka sorkar jylla ka la don ka bynta kaba kongsan ban pynlong ïa ka True North Lapalang ban ïaid shait shait ïa ki projek jong ka, da kaba bei tyngka kaba heh lyngba ka jingthmu jong ka CM ELEVATE.
“Kane ka sorkar ka la ju long ka nongkyrshan kaba khraw ïa ka kam seng kam seng jam bad Ngi la ju pyrshang ha kine ki hynñiew snem ba la leit noh ban ïatreilang bad ki paidbah, ki nongseng kam seng jam, ki seng niam, ki self-help group, bad kiwei kiwei,” la ong u MR. “Kane ka sienjam ka pynkylla ïa ka jingim jong ki briew jong ngi bad ka jingseng kam seng jam ka long ka tynrai jong kaei kaba Ngi kwah ban leh.”
Uwei na ki riew shimet uba don ha lyndet jong ka True North u dei u Gary Lamare, uba la kyntiew ïa ka kyrteng jong u ha ki kot histori jong ka Jylla da kaba long u nong Meghalaya ba nyngkong eh ban kiew ïa u lum Everest.
Ka pung jngi jong ka Mission Compound ka la long kaba jop bad kham hadien kam lah ban pynbiang ïa ki briew kiba bun ha ka nongbah kiba kwah ban nang ban jngi, ban shah hikai na ka bynta ki jingïakop ne tang ban wan jngi kai ban pynjahthait. U Lamare u la ong ba hapoh shisnem ba la plie, ka la don lypa ka jingap kaba palat 200 ngut.
Hadien nangta ki nongseng ki la pynleit jingmut ha ka jaka kaba kham heh kaba don ha Lapalang, ban pynïar shuh shuh ïa ka pung bad ka jingtrei ka la sdang stet ha u snem 2019. Hynrei, ka jingwan jong ka khlam Covid-19 ka la pynartatien. Hynrei lyngba ka CM ELEVATE, ka True North ka la lah ban bteng biang ïa ka jingtei, ha kaba u Lamare u la ong ba ka sorkar ka la ïarap shibun ban pynim biang ïa ka projek lyngba ka jingkyrshan pisa jong ka.
Haba kren shuh shuh halor kane ka jaka kaba thymmai, u Lamare u la ong ba ka jingangnud ka dang sah ba kan long ka jaka lehkai bad jaka kilan met hynrei kan ailad ruh ïa ka True North ban kham pynleit jingmut ha ka shlem ai jinghikai jngi lane ka Swimming Academy jong ka.
“Haba ka Meghalaya ka phah ïa ki nongjngi sha ki lympung ïakop jong ka ri Ngi ju leit kum ki wild card hynrei ha kine ki ar snem ban wan Ngi (True North) kyrmen ba ki nongjngi jong Ngi kin ïoh rung ha la ka jong ka jong ka bor,” u la ong.
Kiwei pat ki mat ba kongsan ki kynthup ïa ka jinghikai ban pynlait im ïa ki briew na kaba ngam jyllop ha um bad ban ïada ïa ki briew, kaba dei ka bynta kaba kongsan haba phaikhmat ïa ka jingbun jong ki Hotel bad ki Resort kiba shna ryngkat ki pung jngi mynta ha Meghalaya.
Kiwei pat ki riew rangbah kiba la ai jingkren ha kane ka sngi ki kynthup ïa u Secretary ka Dorbar Shnong Lapalang; bad u Saloni Verma IAS, Executive Director jong ka Meghalaya Basin Development Agency. La pynpoi ruh ïa ka khubor na ka Chief Secretary ba la shongthait ka Rebecca V Suchiang.