Shillong, Nohprah, 19: Ka Regional Committee na ka bynta ka West Jaiñtia Hills ka la rai ban phah ïa ka kaiphod ka jong ka sha ka Sorkar Jylla hapoh ar bnai.
Haba pyntip ïa kane hadien ba la wai ka jingïalang ha ka sngi Palei, u Chairman jong ka Committee u Bah Sniawbhalang Dhar uba long ruh u Symbud Myntri Rangbah ka Jylla u la ong, “ngi la bthah ïa ki bor synshar district ban pynkhreh ïa ka kaiphod (kaba ïadei bad ki shnong kiba hap hapoh ka thaiñ Block-I) ïa kaba ki la pan por ban pyndep hapoh ka shi bnai ne ar bnai.
“Tang shu ladep ka kaiphod, ngin sa aiti sha ka Sorkar Jylla, kaba ban sa bishar bniah shwa ban don ka jingïalang bad ka Sorkar Assam,” u la bynrap.
Halor ka jingdawa ban pynphai noh ïa ki 36 tylli ki shnong kiba hap hapoh ka Block-I sha ka Meghalaya, u Bah Dhar u la ong, “haoid, ki (paidbah) la pynpaw ïa ka jingsngew jong ki halor kane bad ngi la shim lut ïa baroh ki mat bad ki jingkyrpad ba ki la pynsngew. Hynrei, ki ar tyli ki sorkar jylla kin sa ïashong ryngkat bad ki ar tylli ki Regional Committees (ban bishar katkum ki kaiphod ba ngi la ai), ba kin rai halor kane ka kam.”
U la ïathuh ba ka Regional Committee kan sa shong biang ha ka taiew baar ne balai jong u bnai Kyllalyngkot, ha u snem ban sa wan.
Shuh shuh u Bah Dhar u la pyntip ba ka Committee ka la ïathir ïatai sani ruh ïa ki jingshna katto katne na ka liang jong ka Assam ha ka thaiñ Block.-I.
“Ngi la bthah ïa ki bor synshar district ba kin pynsnageh ïa ka jingshna namarba ka dang hap hapoh ka jaka ba ïakajia pud,” u la ong haba pyntip ba donkam ban burom mar kylliang ïa ka Status Quo.
Ha kawei pat ka liang, u Symbud Myntri Rangbah u la ïaiban halor ka jingdonkam jong ki ar tylli ki jylla ban ailad ïa ki kam pynroi halor ka nongrim ba dei ban da pyntip shwa sha ki bor synshar district, hynrei ym kumba la jia dang shen.
Da kaba pynpaw ba ka Sorkar ka la kut jingmut ban pynbeit noh ïa ka jingeh ha khappud, u Bah Dhar u la ong ba u Myntri Rangbah ka Assam bad Meghalaya shen kin sa buh sngi na ka bynta ban leit jngoh ïa ki jaka ba don ka jingïakajia pud.
“Watla kam pat don kano kano ka jingbuh sngi na ka bynta ka jingïakren pynbeit pud ha ka wat kaba ar, ngi la pyrshang katba lah ban pynbeit ïa kane ka mat kham kloi katba lah,” u la bynrap.
