Hapoh 1 taiew yn weng noh ïa ka jingpynlip bording : Dy CM

Shillong, Jylliew 28 : U Myntri Rangbah ka jylla u Conrad K Sangma ha ka Sngi Lah U Blei ula pynpaw ba ka jinghap ban pynlip bording ilektrik ka dei namar ka jingsniew jong ki mashin pynmih bor ding ha ki 6 tylli ki Unit tangba ka jingmaramot ia ki ka dang ïaid shakhmat khnang ban weng noh ïa kane ka jingpynlip bording. Mynta pat ka Sngi u Symbud Myntri Rangbah ka jylla u bah Prestone Tynsong ula ïathuh ba ïa kane ka jingpynlip bording yn sa weng noh hapoh shitaiew.
“ Nga ngeit skhem ba hapoh shitaiew ngi la lah ban weng noh ïa kane ka jingpynlip bording kata tang shu la dep pynbha ïa ki mashin kiba thut kata ha Leshka Hydro Power Project, Umtrew Stage I bad II” ong u Symbud Myntri Rangbah.
U Symbud Myntri Rangbah u la ïathuh dang ha kine ki khyndiat sngi u la bishar bniah ïa ka jinglong jingman ka jingpynmih bording ha ka jylla bad ki ophisar ka MeECL. “ Ngi la bthah ïa ka MeECL ban shim khia ïa ka kam bad ban ym pynlip bording palat ïaka ar kynta khnang ba kan ym ktah ïa ki paidbah” ong u bah Prestone.
U la ong kine ki jingsniew jong ki mashin ka la ktah da shisha namar ka jylla ka duna bording ilektrik haduh 122 Megawatts bad kane kam long kaba kai. Kine ki lai unit kiba thut ki dei ha Leshka, bad Umtrew Stage I bad II. “ Ngi kyrmen skhem ba ïa kine baroh yn sa lah ban pyntreikam biang hapoh shitaiew. Nalor kata wat ka NEEPCO ruh ka pynduna ban ai bording sha ka MeECL namar ka ruh ka don ki jingthut ki mashin jongka bad kane ka la nang ban khia shuh shuh iaka MeECL. Halor kane ruh ka sorkar ka dang ïakren bad ka NEEPCO ba kan ïaleh ban ai bording kloi ïa ka MeECL” ong u Symbud Myntri Rangbah.
U la ïathuh ba kane ka jingpynlip bording kan long mynta shipor bad ka MeECL ka dang pyrshang katba lah ban pyndep kloi ban pynbha ïa ki mashin ban weng ïa kane ka jingpynlip bording.
Hynnin ka sngi u Myntri Rangbah ka jylla u Conrad K Sangma u la ïathuh ba la ïa bishar bniah ïa ka jinglong jingman ka jingpynmih bording ha ka jylla bad ula lap ba ka daw ba hap ban pyntreikam ïa ka jingpynlip bording man la ka sngi ka dei namar ba 6 tylli ki kor ki bor pynmih bording kata lai ki National kompani kynthup ïa ka OTPC bad ka Kopli bad lai ki jong ka jylla hi kata ha Leshka bad Umtrew Power Project ki don jingthut.
Ka sorkar ka duna bording haduh 122 MW na ka daw ka jingthut kitei ki kor ki bor. Kumba long mynta kumba 42 MW na Leshka bad 21 MW na Umtrew ym lah shuh ban pynmih bording namar ka jingthut ki kor ki bor pynmih bording. Ka jingpynbha ïa ki ka dang ïaid shakhmat.
U la ong ka sorkar ka dang pyrshang ban thaw lad kumno ban pynduna ïa ki kynta pynlip bording namar ki don ki jaka kiba hap ban pynlip haduh 3 kynta. Ki don ki Unit ba la jan dep bad treikam noh bad lada ki treikam kloi lehse kin sa pynbeit ïa ka por pynlip bording ba thymmai.