Shillong, Nailur 06: Ka Meghalaya High Court ka la bthah ïa ka sorkar jylla ban pyndep ïa ka jingpyntreikam ïa ka Contributory Provident Fund (CPF) na ka bynta ki non-government college teacher ha ka jylla hapoh ka shibnai.
Ïa kane ka hukum la pynmih da ka division bench jong u Acting Chief Justice Hamarsan Singh Thangkhiew bad u Justice B Bhattacharjee halor ka writ petition ba la ujor da ka Meghalaya College Teachers’ Association (MCTA).
Ha ka jingsngap bishar, ka tnat pule ka aiti hakhmat ka court ïa ka kaiphod kaba 5 tarik u Nailur, 2024 kaba ong ba ka tnat ka la bud ïa ka hukum ba la mynjur da ka division bench ha ka 30 tarik u Jymmang.
U Advocate General Amit Kumar kumjuh ruh u la ïathuh ïa ka ïingbishar ba ka la don ka jingbud bad kano kano kaba la bthah da ka court halor kane kam kaba la buh ha ka jaka kumba ka long.
Ha kawei ka liang u nongsaid aiñ ka MCTA u R Mazumdar u la pynpaw ka jingpyrshah jur halor ki bynta jong ka kaiphod khamtam ha ka paragraph 12 bad ong ba ka jingmynjur kaba donkam yn dang hap ban ïoh na ka sorkar jylla, kum ka jingïasoi jingmynjur bad ka State Bank of India (SBI) ban plie ïa ka Centralised Provident Fund account.
U Advocate General haba jubab da kaba ïathuh sha ka High Court u la ong ba kane ka kaiphod ha ka jingshisha ka pyni ïa ka jingïaid ki kam kiba la leh ban bud ïa ka hukum jong ka court.
“Ha kaba pyrkhat kumba la aiti ba ka kam ka la sdang, la khmih lynti ba baroh ka jingleh dei ban pyndep hapoh ka shibnai naduh ba la pynmih ïa ka hukum,” ong ka High Court ha ka hukum. Ïa kane ka jingbishar halor kane ka kam yn sa shim biang ha ka 1 tarik u Risaw.
