Shillong, Jylliew, 01: Ki nongtrei Casual bad Contractual jong ka skulbah NEHU kiba don hapoh ka shatri jong ka All NEHU Workers Union (ANWU) ha ka sngi Balang ki la pynlong da ka jingïakhih kaba jaijai hakhmat ka ophis treikam jong u Vice Chancellor ka skulbah NEHU u Prof. P.S Shukla ban dawa ïa ka jingthuh noh ïa ki kum ki nongtrei bapura.
Kine ki nongtrei Casual bad Contractual kiba trei ha ki tnat treikam bapher bapher jong kane ka skulbah ki la ieng beit triang khlem khih wat hapdeng ka jingther jong u lapbah hakhmat ka phyllaw jong ka ophis treikam u Vice Chancellor.
Kane ka jingïakhih kaba khlem pud sngi, ka la sdang naduh ka 2 tarik, Kyllalyngkot, 2022 hakhmat ka ophis treikam u Vice Chancellor ka NEHU, Shillong bad hakhmat ka ophis u Pro Vice Chancellor ka Tura Campus.
Kane ka jingïakhih kaba khlem pud sngi ka la bteng haduh ka 8 tarik, Kyllalyngkot, 2022.
Dang shen ha ka 21 tarik u bnai baladep, ki dkhot jong ka ANWU ki la pynlong ruh ïa ka jingïakhih shabar jong ka khyrdop ka skulbah NEHU ha ka jingleit iuhkjat jong u Myntri ka Sorkar Pdeng u Dharmendra Pradhan uba peit ïa ka Ministry of Education ban ïashim bynta ha ka jingpynkup burom ïa ki samla pule ha ka XXVII Convocation. Kane ka jingïakhih ka la ïatakhuh ruh bad ki dkhot ka KSU kiba la ieng bad ki plakad hakhmat ka khyrdop jong ka skulbah NEHU.
U Myntri ka Sorkar Pdeng u la hiar na ka kali ban leit ïakren bad ki nongïalam jong ka ANWU bad ka KSU ha kaba u la kular ba un sa pynsngew ïa ki jingdawa ki jong ki sha ki tyndong shkor jong ka Sorkar Pdeng.
U President jong ka ANWU, u Samla Napoleon Mawphniang u la ïathuh ba ka Union ka ladep phah ïa ka dorkhas sha u Vice Chancellor jong ka skulbah NEHu naduh ka 29 tarik, Ïaiong, 2022 bad aipor ruh 30 sngi ban pynurlong ïa ka jingdawa, kata, ban ithuh noh kum ki nongtrei bapura ïa ki nongtrei Casual kiba la shakri ha kane ka skulbah la palat 10 snem.
Hynrei namar ka jingbym urlong ka jingdawa, ka Union sa shisien biang ka la pynlong ïa kane ka jingïakhih hakhmat ka ophis treikam jong u Vice Chancellor ha Shillong bad hakhmat ka ophis treikam jong u Pro Vice Chancellor ka Tura Campus.
