Shillong, Nailur 29 : U Myntri Rangbah ka Jylla Conrad Sangma ryngkat u Symbud Myntri Rangbah Bah Prestone Tynsong ha ka step sngi Palei ki la plie paidbah ïa u mot dur jong u MLA bad MP barim ka Jylla (L) Bah Peter G Marbañiang ha Laitumkhrah Police Point.
Lah ban kdew hangne ba u Bah Peter u dei ruh u Kpa jong ka MLA ka Shillong East Kong Ampareen Lyngdoh.
Ka jingplie ïa utei u mot ka long ban pynsahnam ïa utei u rangbah uba la noh synniang shibun ïa ka Jylla kum u MP bad ruh kum u MLA ha ka lyngkhuh dap 25 snem ka jingkhlad noh jong u.
Haba kren ha katei ka jingïalang u Myntri Rangbah u la ong ba ka jingtei ïa u motdur ka long ruh ban pynkynmaw ïa ka pateng ban sa wan ïa ka jingnoh synñiang jong utei u nongmihkhmat ba pawnam ka jylla.
Shuh shuh u la ong ba katei ka jingrakhe dap 25 snem ka jingkhlad jong u Bah Peter ka pynphalang biang ïa ka jingïadei ba jan ba utei u MP ba rim u don bad u kpa jong u, u (L) PA Sangma ba dei ruh u Lamphang barim ka Lok Sabha.
“Nga kynmaw ïa kitei ki arngut ba ki donlang bad shwa ban wan shane nga la peit katto katne tylli ki dur jong ki ba ki ïa shongkai lang bad ïakren. Kadei ka lynti ïaid kaba la jrong bha naka bynta ki ïing jongngi baroh,” u la ong.
Shuh shuh u ong ruh ba kumba u Bah Peter Marbaniang bad u PA Sangma ki treilang, mynta ruh ki khun jong ki, kynthup ïa u bad ka Kong Ampareen ba ki ïatrei lang na ka bynta ban shakri ïa ka jylla kumba la lamkhmat da ki kpa jong ki.
U Bah Prestone pat u la ong ba da kaba kynmaw ïa utei u rangbah uba la paw ym tang ha ka jylla hynrei ha ka thaiñ shatei lam-mihngi baroh kawei, kan ïarap ruh ïa ki longdien bad ka ïing ba kin lah ban ai shuh shuh ka jingshakri kaba kham janai ha ka imlang sahlang.
Ha katei ka sngi la kyrkhu ïa utei u mot dur da u Archbishop Victor Lyngdoh ha ryngkat ka jingdonlang baroh ki khun jong u Bah Peter, ki bahaïing hasem, ki heh sorkar kynthup naduh u DGP bad ruh ki riewniam nalor kiwei kiwei.
