Nongpoh, Risaw 16: Ha kawei ka jingjia kylla kali, ki nongshong jong kawei ka bus night super ki la her mynsiem bad lait na ka jingjia ba sngewsih kaba dei hadien ba katei ka bus Night Super ka la kylla mynta ka step ha ka surokbah NH-6 ha Ri Bhoi ha Umling.
Kane ka jingjia kala jia ha ka por 7 shiteng eiei mynstep, ha kaba la kynnoh ba utei u draibar u la shu pynher sted ïa ka Kali, hynrei hadien ba la poi ha khongdong Umling katei ka bus ka la kylla noh bad la don ki nongshong kiba la mynsaw ha kaba la rah noh mar mar sha Civil Hospital bad Bethany Hospital Nongpoh.
La ong ruh ba kane ka Bus Night Super kaba don ïa number ML 05-L-8998 ka wan na ka thaiñ Silchar ban hiar sha Guwhati, hynrei hadien ba la poi ha katei ka jaka ka la kyllla noh haduh ba la wanrah ruh ka jingdheng kali ba shipor namar katei ka bus kala kylla beit hapdeng surok da kaba jam na shilliang sha shilliang ka surok 4 lane.
Katkum khubor ba la ioh lum, la ong ba u dribar u la phet krad na katei ka jaka hadien katei ka jingjia bad na ka liang ki bor pulit ka Nongpoh traffic branch ki la wan poi mardor ban pynlong ïa ka jingtohkit bad ruh ban ïarap ïa kito kiba la mynsaw bad la ïathuh ruh donbok ba ha kane ka jingjia ym shym la don kano kano ka jingjia ba sngewsih lait noh ka jingmynsaw ba malu mala.
Ki pulit ki dang pynlong ka jingtohkit halor kane ka jingjia bad ban weng na ka jingdheng ki Kali ha ka surok bah ki la tan noh ïa katei ka Bus Night Super na katei ka jaka ba kylla.
