Hapdeng shibun ki jingeh, rakhe ka shnong Umsamlem ïa ka jingïaid lynti ba 75 snem ka shnong

Nongpoh, Nohprah 17: Ka shnong Umsamlem ha Ri-Bhoi mynta ka sngi hapdeng ka jingiphuh iphieng kala rakhe ïaka jingdap 75 snem ka jingïaid lynti jong ka shnong (Platinum Jubillee) kaba la pynlong shnong naduh u snem 1946 da u Thomas Hajar Singh Syiemiong.
Ha katei ka sngi la wan ban pynshit pynshngaiñ da ka jingdonlang u Bah Jason S Mawlong MLA ka Umsning kum u kongsan, Bah Sunshine Kharbani Rangbah Shnong, Kong Meristella Lyngdoh President Seng Longkmie bad kiwei kiwei ki riew rangbah bad ki paibah Nongshong shnong ka Shnong Umsawlem.
Ha kane ka sngi la pynsngew ruh halor ka jingiaid lynti ka shnong da ka sngi ka Samla Aitirilis Lyngdoh kawei naki khun samla jong ka shnong Umsamlem kala pynpaw ba ka shnong Umsamlem ka don kumba 15 km na Nongpoh bad 9 km na Umsning C&RD Block bad ïaka shnong Umsamlem la wan ban shong shnong nyngkong da u Koharam Sangma bad ka tnga jong u ha u snem 1944, bad dei hadien ka jingwan shong shnong jong u Thomas Hajar Singh Syiemiong bad ka tnga jong u ka Eskil Lyngdoh kiba dei naka shnong Mawsyntai ha kaba la suid la shor ruh ïaka kyrteng Umsamlem da u Thomas Hajar Singh Syiemiong kaba u la sot naka wahduid kaba sam lyngba naka shnong Rongpharkong bad kaba tyngkhuh bad ka wah Umran kaba jrong kumba 1km shiteng bad naduh kitei ki snem katei ka shnong kala nang roi nang par parum pareh.
Ha katei ka sngi la ioh ruh ban plie ïa u maw tablet jong ka shnong kum ka jingsahkynmaw ïaki longshuwa kiba la pynlong shnong bad kum ka dak ka jingrakhe ïaka jingdap 75 snem jong ka jingïaid lynti.
Haba kren ha katei ka sngi kum u kongsan naka liang u Bah Jason S Mawlong u la la pynpaw baka jingïaid lynti ba 75 snem jong ka shnong kam dei ka lynti kaba suk, ha kaba ki nongïalam shnong kiba mynshuwa ki mad shibun ki jingeh ban ïalam bad pynlong shnong, hynrei dei lyngba ka jingiohi jngai jong ki nongïalam katei ka shnong kala nang roi katba nangmih ki sngi bad long kumba ka long mynta ba la sakhi ruh ba la don shibun ki jingkylla ha kaba paidbah noghsong shnong ki la dang kiew ha ka longbriew ka man briew.
Shuh shuh, u la buhr uh ka jingkyntu ïaki nongshong shnong ba kin dang bteng ban trei bad shakri naka bynta ka bha ka miat jong ka shnong khamtam ban dang kyntiew ïaka roi ka par ba ka shongsuk shonsainjong ka shnong ba kum ka shnong kan dang don shibun ki jingkylla ha ki snig bad ki snem ban sa wan, u la bynrap.