Hapdeng ki ummat kthang bad jinglung mynsiem la tep ïa kiba shah pynïap ha Nongrah

Shillong, Jylliew, 02: Da ki spah ngut ki paidbah nongshong shnong jong ka shnong Nongrah bad na ki shnong kiba marjan ryngkat ki ummat ktang bad ka jinglung mynsiem ka bym lah ban batai, ki la tep donburom ïa ki arngut ki shipara kiba shah pynïap ha la u jong u Kpa ha Nongrah ha ka miet Lah sngi u Blei ka 30 tarik, Jymmang 2022.
Hashwa ban rah ïa ka met ba dang sah jong kine ki arngut shipara sha u lum jingtep, la pynlong shwa ïa ka jinglehniam kaba khatduh na ka bynta ka jingjahthait ka mynsiem jong ki da u Parish Priest jong ka Divine Saviour’s Church, Nongthymmai Parish u Rev. Fr. Glorious Syiemlieh ha ryngkat ka jingsakhi lang jong ki riewngeit ka Balang Shnong Nongrah, ki riewniam, ki Rangbah Balang bad ki nongkitkam Balang, ki dkhot jong ka Seng Kynthei Balang Catholic Nongrah, ki dkhot ka Seng Samla Shnong Nongrah, u MLA jong ka South Shillong Constituency u Bah Sanbor Shullai, u Rangbah Shnong jong ka shnong Nongrah u Bah B. Pyngrope, ki Rangbah Dong jong ki Dong bapher bapher jong ka shnong Nongrah, ki dkhot jong ka Khasi Student’s Union (KSU) Nongrah Unit bad ka Nongthymmai Cirlce lem bad ki riewpaidbah.
Ki nongkren kiba la ai jingkren ha kane ka jingleh burom ïa ka met ba dang sah jong kine ki arngut shipara, ki la pynpaw ïa ka jingsngewsih kthang kaba kim ju poi pyrkhat mynno mynno ruh ba kum kane ka jingjia kan wan jia hapoh ka shnong Nongrah kat haduh ba ka la pynsuhjer ym tang ïa ki paidbah nongshong shnong jong ka shnong Nongrah hynrei wat ïa ka imlang ka sahlang baroh kawei.
Katba u Myntri ka Sorkar Jylla u Bah Sanbor Shullai uba dei ruh u MLA jong ka South Shillong Constituency uba la leit sngewlem ïa kane ka ing sem jong ki arngut shipara, ha ka jingïakren bad u nongthoh khubor u la ong, “kum kane ka jingjia ka la pynkyndit lut ïa baroh. Ym sngew lah mutdur, ba kat u Kpa ïa la ka doh ka snam lajong kiba dang dei ki khun blei un ot syndon na ryndang ban shim syndon ïa ka jingim. Kane ka long ka bym lah pdiang.”
“Kaba sah mynta, ka long sa tang ban shu duwai ba u Blei un ai ka jingsneng bad haba u (Kpa) la phla kumto ka aiñ ka dei ban leh ïa kaba donkam bad ban set along shirta lane kaba nga sngewkhia kum ïa kine ki jait briew dei ban shu sdien phasi syndon khnang ba kane ka khubor kan ïaid kylleng kylleng ba kiwei ruh kin ym nud shuh. Khamtam ïa ki nongdih droks kiba pynjot ïa ka imlang ka sahlang,” la ong u Bah Sanbor.
“Lada phi peit ïa ka jingjyllei ka tuh ka thiem bad ka jingpynshong syier ïa ki paidbah bad ka jingdkhat jubor ïa ka jingim jong ki khun blei ki mynsiem baluilui kum ha kane ka jingjia, ngi kum ki riewrangbah bad kum ki nongïalam ngi sngewkhia shisha, ngin hap ban shimkhia ïa kane ka kam bad ngin ym ieh bad ka aiñ hi kan sa leh ïa kaba donkam ban pynsajia ïa u (Jeofreson Jana).
Kum ban shu pynkynmaw, ïa u Jeofreson Jana uba la don mynta ha ka along ki Pulit la kem ha ka janmiet sngi Baar bad ha ka jingtohkit u la phla ha ki Pulit ba u la leh shisha ïa kane ka kam bymman pyrshah ïa la ki khun, kata, ïa iwei ïa kynthei ba dang saw snem ka rta bad ïa u khun shynrang uba dang ar snem ka rta.
Ïa u Jeofreson Jana ki pulit ki la pynngat hapoh ka kyndon 364 bad 302 jong ka Indian Penal Code kiba dei ki kyndon rahbor bad pynïap briew.
Ki Pulit ka East Khasi Hills District ki la thaw ruh ïa ka Special Investigation Team (SIT) ba la khlieh da u Superintendent of Police (City) u Bah Vivek Syiem bad u Dy. SP (Crime) ban pynlong ïa ka jingtohkit kaba bniah halor kane ka jingjia.
Katkum ka jingïathuh jong u SP (City) u Jeofreson Jana u la phla ba ka jingkput ïa ki khun ka dei tang ba don daw bad la ka kurim namarba ym shym la ïasah lang shuh.
Une u Heh Pulit u la ïathuh ba u Jeofreson Jana u la phla ba u la kwah ban leit phai biang sha la ka kurim hynrei ka kurim ka la kyntait na ka daw ba u ju leh tohmet bad pynsajia ïa ka bad nalor ba u dei ruh uba ju kyrni ha ka kyiad bad uba dang shu mih dang shen na ka jaka sumar ba kyrpang (rehabilitation centre).