Hapdeng ki kynrum kynram kiba bun ha NEHU iehnoh kam u Vice Chancellor u Prof. S Umdor

Shillong, Nohprah 16: U Pro Vice-Chancellor ka North-Eastern Hill University (NEHU), u Prof S Umdor, u la phah ka shithi iehnoh kam na ka kam kaba la treikam naduh ka nohphai sngi jong ka 15 tarik mynta u bnai.
Kane ka rai ka la wan hapdeng ka kynrum kynram ha ki rukom pynïaid kam jong ka university, kaba la paw ruh na ka jingjah ki nongtrei ne ophisar kiba paw khmat bad na ka jingpyrshah jong ki samla pule bad ka seng ki nongtrei.
Ha ka shithi u Prof Umdor u la pynpaw ka jingai khublei ïa baroh kiba la ïatreilang bad ai ka jingkyrshan da kaba kyrmen ba kan wan biang ka suk ka saiñ bad ka jingïaid shaphrang jong ki kam hapoh NEHU.
“Haba phai ha ki jinglong jingman kiba mih bad kiba don mynta na ka jingbym don ka jingkyrshan bad ka jingïai don ka jingbym thikna halor ki rai kiba kongsan jong ka jaka pule, la sngew ba lada ïai bteng ban don ha office kan ym ai ka jingshakri kaba bha ïa ka University ne ban bat ïa ka kyrdan jong ka jingkhuid jingsuba bad ka jinglong ba janai kaba la khmih ha kane ka kyrdan,” u la ong.
Kane ka jingiehnoh kam ka la long ha ka por ba la don ruh ki jingjop kiba kongsan kaba kynthup ïa ka jingjop ban pynlong ïa ka end-semester examination, ka jingpyndep ban kyntiew kyrdan ïa ki nonghikai, bad ka jingpynlong ïa ki prokram pule la ka long ha ka ri ne ha ka pyrthei kum ka Smart India Hackathon 2025.
Hynrei ka university ka la hap ban mad bun ki jingïaleh, ba kynthup ïa ka jingpynduna kaba 42% ha ka jingïoh ïa ki grant na ka UGC bad ka kyrdan na ki samla pule bad ka seng ki nongtrei halor ka jingpyrshang ban pynlong ïa ki Executive Council meeting khlem da don ka jingmihkhmat kaba biang.
“Kawei na ki jingïakhun ne jingïaleh kiba kongsan ha kane ka por ka dei ka jingpynbeit ïa ka jingpynduna kaba 42% ha ki UGC recurring grant na ka bynta ka snem mang tyngka 2025-26. Lyngba ki jingpyrkhing kiba la shim haba ïadei bad ki tyllong, ka revision jong ka examination fee, ki la don ki jingpyrshang ban pynneh ïa ka pisa jong ka University da kaba pynthikna ban siew ïa ka tulop ha ka por kaba biang ïa ki nongtrei ba shipor. Kiwei ki kynthup ïa ka jingïaid ka NEP-UG programme sha ka fifth semester, ka MOOC, bad ka jinglah pynlong ïa ka CUET-based admission na ka bynta ki college ba la ïoh jingithuh ne pynïasoh ha Meghalaya kaba dei ha ka sien kaba nyngkong,” ong u Prof Umdor.
“Hynrei ka jingpyrshang ban pynlong ïa ka jingïalang ka Executive Council hapoh ka jinglong chairman jong u Vice-Chancellor, wat hapdeng ki jingpyrshah na ki samla pule bad ka seng ki nongtrei ka la wanrah shuh shuh ka jingeh,” u la bynrap.
Ka NEHU Students’ Union, ka NEHU Teachers’ Association, bad kiwei ki seng ki la dawa ïa ka jingdonkam ban iehnoh kam jong u Prof. Umdor da kaba pynpaw ba don ki jingpulom ha ki kam pynïaid ka skulbah bad kiwei pat ki mat ba kongsan.