Hapdeng ki jingeh, ïeng rangbah ki khun samla ban kyrshan ha ki jingpule bad ka ïing ka sem

Nongstoiñ, Naiwieng 30: Wat hapdeng jong ka jingkylla jong ka juk, ka jingïaid jong ka por, na u snem sha u snem, ha kaba lap bad shem ba ki hep kiba rit ne ki khunlung ki khynnah kiba mynta bun ki la sdang ban lapmiet satang ha ki mobile bad kiwei kiwei ki jingpynbyrngia kiba katkum kane ka por, pynban la shem ba dang don ruh shibun ki khynnah ne ki hep kiba rit kiba shim ïa ka jingkitkhlieh wat ha ki kam ïing kam sem ban kynshan ïala ki kmie ki kpa ha ka ïoh ka kot ban kamai jakpoh.
Ïa kane lah ban pynshisha lyngba ki heprit shynrang bad kynthei kiba na ka shnong Thiepjaphlang, kawei na ki shnong ha ka thaiñ Nongstoiñ kaba dei ruh ka shnong kaba don ha surok bah kaban leit sha Riangdo.
Kitei ki heprit la ïohi ba ki ju shong ha ki dukan ha shilynter jong katei ka surokbah ban die ïa u soh Ñiamtra wat hapdeng jong ka miet ryngkat ka khreh ïa la ki kot kum ka jingpynkhreh ïa ki exam.
La ong ba ki kmie ki kpa jong kitei ki khynnah mynsngi mynsngi ki leit sha la ki lyngkha ban ot bad shoh kba namar ba lah dei ka aïom ot. Hadien ba ki la wan na ki lyngkha ki sdang sa ka ban shet ban tiew bad don ruh kiba dang ri khun rit. Kumta kitei kiba la sdang san ha ka karta ki trei minot da kaba trei shitom da kaba shong die soh bad ka khreh kot.
Haba ïadei bad kane haba ïoh ban ïakren bad kawei na ki longkmie kaba la tip kyrteng kum ka kong D.Mawlieh, ka la ong ba baroh kitei ki khynnah ki dei tang shiïing shisem, ïa kane la ju leh man la ka sngi man la u snem.
La ong shuh shuh ba kitei ki soh ki dei kiba shu kheit na la Kper lajong bad ka dei ka jingpyrkhat jong kitei ki khynnah ban ïarap ïa la ki kmie ki kpa kiba ki la jrem, ban leit shong die soh hadien ba la wan na ki lyngkha kumta kine ki khynnah ki la hap ban shim ïa ka jingkitkhlieh na ka bynta ka ïing.