Nongpoh, Lber 27: Ka kynhun jong ki samla naka thaiñ Marmaiñ kaba la tip kum ka Marmaiñ Area Youth Upliftment (MAYU) kala pynkut noh ïaka lympung bad tamasa lehkmen ki samla ba 2 sngi kaba la tip kum ka 9th Cultural Festival ha Marmaiñ.
Ka thong bad ka jingangnud jong katei ka tamasa ka long ban wanrah ka jingïaieid bad long kum shipara hapdeng ki khun samla, ban kyntiew bad ai mynsiem ïaki bad khamtam ban pynneh pynsah ïaka riti ka dustur bad ka kolshor tynrai bala suid la shor da u mynbarim ba kim dei ban duh ban dam noh hynrei ban pynim ïaki pateng la pateng khamtam ki khun samla kiba don ka bynta kaba khraw.
Ïa katei ka jingpynhap pyrda noh ïa katei ka lympung la wan ruh ban sakhi da u Bah Mayral Born Syiem MLA ka Nongpoh ba dei ruh u Co-Chairman ka MIDC kum u kongsan haka jingdonlang u Bah Balajied Ranee MDC, Bah CB Syiem CEM barim ka KHADC, Bah Owen Terang uwei naki riew rangbah ka thaiñ, ki nongïalam jong ka MAYU bad kiwei kiwei ki riew rangbah.
Ha katei ka sngi naka liang ka MAYU kala sam ruh ïaki khusnam sha ki samla pule kiba wanrah ka nam ka burom bad wan shakhmat ïaki jingpule jong ki kum ka jingai mynsiem bad ka nuksa sha kiwei pat ki para samla bad la pynshit pynshngaiñ ha katei ka sngi da ki jingrwai, ki jingshad bad ki sur tynrai bala shim bynta da ki khun samla ka thaiñ.
Haba kren ha katei ka sngi naka liang u Bah Mayral Born Syiem kum u kongsan u la pynpaw ka jingsngewkmen kaba khraw ban iohi ba ki khun samla ha katei ka thaiñ ki ju pynlong katei ka tamasa naka bynta ban kyntiew bad pynneh pynsah ïaka kolshor tynrai bad ka riti ka dustur ba kim dei ban duh ban dam noh hynrei ban pynneh pynsah ïaki khamtam ki jaitbynriew rit paid ha ka thaiñ Shatei Lam Mihngi ka long kaba donkam ba kin pynneh bad sumar ïaki jong la jong bad ki riti ki dustur.
U la ong ruh ba ki khun samla ki don ka bynta kaba khraw ban pynim bad pynneh pynsah ïaka riti ka dustur wat lada ki leit ban wad ïaka jingnang jingstad kylleng ki jaka hynrei u la kyntu ïaki ba kim dei ban klet bad ka long kaba kongsan ban pynim ïaki riti ki dustur namar ka jaitbynriew kaba don ïaki riti ki dustur ka dei ka jaitbynriew kaba im.
