Hapdeng ka jingshongkun kut noh ka 6th Khulumala Memorial Football Tournament ka JS Pala District

Shillong, Nailur 13 : Ka lympung ïalehkai football ka 6th Khulumala Memorial Football Tournament jong ka Jingïaseng Samla Pala District ka la poi noh sha kaba kut ha ka sngi ba ar ha madan ïalehkai jong ka Balang Presbyterian Kseh.
Ha katei ka lympung ïa ka nam lahduh ha ka liang ki shynrang la ïoh rah da ka Jingïaseng Samla Balang Umkyrpong kaba la pynliem lyngba ka tie breaker da 5-4 kol ïa ka Jingïaseng Samla Balang Larket, katba ha ka liang ki kynthei ïa ka nam lahduh la ïoh rah da ka Jingïaseng Samla Balang Umkyrpong kaba la pynliem ïa ka Jingïaseng Samla Balang Kseh da ka jingïashut tie breaker da 5-3 kol.
Shwa ban sdang ka jingïalehkai la ïoh ban pynlong da ka jingïalang kaba lyngkot hapoh ka jingïalam jong u Chairman jong ka Jingïaseng Samla District, u Tbn. D. S. Salahe. Ha kane ka sngi la ïadon lang ryngkat ban sakhi ïa kane ka jingïalehkai da ka jingdon ryngkat ka Kong Synta Mary Shylla kum ka Kongsan bad Bah Chibor Wahlang kum u Symbud Kongsan ha ryngkat ka jingdon lang ki Pastor, ki Tymmen Basan bad ki nongshah khot sngewbha.
Ha kaba sdang la ïoh shwa ïa ka jingkren na u Rev. D. H. Malang, Pastor incharge, uba la kitbok kitrwiang bad ruh ka jingai mynsiem ïa ki khun samla, bad la ïoh ka jingkren na u symbud kongsan Bah Chibor Wahlang u ba la ai mynsiem ïa ka District bad ki khun samla ba kin nanglah ban pynmih shuh ki kynja jingïalehkai khnang ba ki khun samla kin lait na kiba bun ki jingsniew bad kaba khatduh la ïoh ka jingkren na ka kongsan Kong Synta Mery Shylla kaba la pynpaw ka jingsngewnguh ïa ka District kiba la khot sngewbha ïa ka ban long kum ka kongsan ha kane ka sngi bad ka la ai shibun ki kyntien kyntu kynpham ïa ki khun samla ba kin long kiba smat ba sting ha ka ban kilan met ha kiba bun ki kam sport na ka bynta ka jingmyntoi ïa ka met ka phad bad ruh kumjuh ïa ka koit ka khiah bad ban shakri ïa U Blei ba kin long ka nuksa ïa kiwei.
Ha kane ka sngi la pynïalehkai ïakp mareh ba 100 m race tang na bynta ki kynthei ha kaba ka samla Daplin Pasleiñ kaba dei na ka Balang Umkyrpong ka la jop ha ka kyrdan kaba nyngkong, ka samla Sumarbha Manar na ka Balang Kseh ka la wan ha ka kyrdan kaba ar bad ka samla Phidora Pasleiñ na ka Balang Pala ka wan ha ka kyrdan kaba lai.
Ki lahduh baroh kin ïoh ban leit mihkhmat sha ka Jingïaseng Samla Sutnga Presbytery ka ban sa long ha u bnai Risaw mynta u snem 2022.
Ha kaba pynkut ka Jingïaseng Samla Pala District ka ai ka jingkhublei ïa ki Kongsan bad symbud Kongsan naduh ka sngi ba sdang haduh ba pynkut ïa kane ka tournament bad kumjuh ïa ki Pastor bad ki Tymmen Basan jong ka Jingïaseng Samla Pala District bad ïa kiba nabar ruh.