Shillong, Naiwieng 12 : Ka Shad Nongkrem kaba dei ka jinglehniam ban ainguh ïa U Blei Nongbuh Nongthaw halor ka jingbiang ka rep ka riang, kaba la sdang ha kine ki san sngi ba la leit noh ka la kut noh mynta ka sngi hapdeng ka jingphuh jingphieng, jingshongkun, ha ka nongbah jong ki Hima Khasi ne Khasi State ha kato ka por ha Smit kaba jngai tang 15 Km ei ei na nongbah Shillong.
U Syiem ka Hima Khyrim ryngkat bad ki Myntri bad ki Bakhraw ka Hima ki la pyndep ïa ka jinglehniam pomblang. Kane ka jinglehniam ka long ka jingknia ban ainguh ïa u Lei Shyllong bad kumjuh ruh sha ki longshwa man shwa kiba ïadon kti ha ka synshar ka khadar.
ïa kane ka jinglehniam Shad Nongkrem la ïashim bynta ha ka jingïashad da ki thei sotti ryngkat ki jingriam jingbeit tynrai ha ka ksiar ka rupa. Ki samla shynrang ruh ki la ïashim bynta ha kane ka jingshad hakhmat ka ïing Sad da kaba pynïahap tara ïa ka sur ki ksing bad ki tangmuri.
Ki paidbah na kylleng ka Hima Khyrim ki la wan ban ïashim bynta ha katei ka jinglehniam. La pynphuh pynphieng da ki jingïadie ïathied ïa ki mar rep, ki mar ba shna kti bad bun jait ki tiar ha madan shabar ka ïing Sad.
Ryngkat ka riam ka beit kaba i shongkun, ki paidbah kila ïatuid ban leit peit ïa katei ka Shad Nongkrem. Kane ka Shad Nongkrem ym tang ba ka kring ïa ki briew na kylleng ka jylla, ka ri India hynrei wat na kylleng ki ri ka pyrthei ruh.
ïa kane ka Shad Nongkrem la peit bad pynïaid da u Syiem ka Hima Khyriem u Pa’iem Dr Balajied Sing Syiem uba riam ha ka jingriam Syiem tynrai. U Pa’iem u la ong “ Ngi la ïai pynneh pynsah ïa kane ka jinglehniam Shad Nongkrem kaba la hikai ïa ngi da ki longshwa man shwa. Kum ki nonghiar pateng ïa kane ka riti ka dustur ngi donkam ban sumar bad ïai ïada ia ki riti ki dustur jong ngi wat hadpeng kane ka juk jong ka jingkylla ha ka pyrthei baroh kawei”.
ïa kane ka Shad Nongkrem la wan ruh ban sakhi da u Lat ka Jylla u CH Vijayashankar, u Symbud Myntri Rangbah ma Sniawbhalang Dhar, Myntri kam jngohkai bah Paul Lyngdoh, u CEM ka KHADC bah Pyniaid M Syiem bad kiwei kiwei ki kynrem ki lyndan.
