Nongpoh, K’Lyngkot 15: Ka shnong Umsaw Nongbri mynta ka sngi hapdeng ka jingiphuh iphieng ka la pynkut noh ïa ka taïew lehkmen kaba saw sngi, kaba la tip paidbah kum ka Umsaw Nongbri Week, da ka jingïakop Miss & Master Umsaw Nongbri ryngkat ka jingbam khana shnong ban wanrah ka jingïa ieid bad ka jingtylli hapdeng ki paidbah nongshong shnong.
Ha kane ka sngi la wan ban sakhi da u MLA ka Nongpoh, u Bah Mayralborn Syiem, kum u kongsan, ryngkat bad u Bah Y Kurbah Executive Engineer ka PHE Nongpoh Division, u Bah Mission Tron, Rangbah Shnong ki Syiem na ka Raid Nongtham, Khyriem bad na ka Raid Nongbri, ki Rangbah Shnong na ki shnong marjan kum ka Pahamranïai bad ka Umdoh, lem bad ki nongïalam Balang, ki tymmen basan bad kiwei kiwei ki riew rangbah na katei ka shnong.
Ki nongïalam shnong ki la ong ba ka taïew lehkmen kam dei tang ka jingïalehkai ne jingïalehkmen hynrei ka long ka lad ban tei ïa ka jingïajan hapdeng ki briew, ban pynskhem ïa ka jingïadei hapdeng ka shnong bad ki nongïalam, bad ban pynneh ïa ka jingïaïeid hapoh ka shnong.
Shuh shuh ha kane ka sngi ka shnong ka la ïoh ruh ban lehkmen halor ka jingïoh pdiang ïa ka khlaw na ka Raid Nongbri, ka jingïoh ïa ka umbam umdih na ka Raid Nongtham Khyriem Syiemship, bad ruh ka jingïarap jong ki shnong marjan kum ka Pahamranïai bad ka Shilliang Umdoh ban pynskhem ha khmat ka tnad PHE na ka bynta ka skim umbam umdih jong ka shnong.
Ha kane ka sngi kum ka dak ka jingsngewnguh ïa ki briew kiba la lehbha ïa ka shnong na ka liang ka shnong ka la pynkup burom ïa ki riew paidbah bad ki nongïalam kiba la noh synniang ïa ka shnong, kynthup ïa u MLA ka Nongpoh, ïa u Engineer ka PHE, ïa ki ar ngut ki Syiem bad ïa ki Rangbah Shnong na ki shnong ba marjan bad lyngba ka jingpynkut ïa kane ka prokram, ka shnong Umsaw Nongbri ka la pynpaw ïa ka jingangnud ban dang bteng ïa ka jingïadei bad jingieid hapdeng ki paidbah nongshong shnong ban ïatreilang na ka bynta ka bha ka miat jong ka shnong ha ki snem ban wan.
