Hapdeng ka jingiphuh iphieng pynhap pyrda noh ka Don Bosco English School ïaka taiew lehkmen ki khynnah
Nongpoh, Naitung 29: Hadien shitaiew lynter bala pynlong ïaki prokram bapher bapher kaba dei ka taiew lehkmen ki khynnah skul jong ka Don Bosco English School, Umden, ha kaba ki khynnah kila ioh ban lehkmen bad ban shimbynta haki prokram bad ki jingïakop bapher bapher, ki bor pynïaid skul hapdeng ka jingiphuh iphieng mynta ka sngi kila pynhap pyrda noh ïa katei ka taiew lehkmen ki khynnah ha Auditorium jong ka Parish Umden.
Ïa katei ka taiew lehkmen ki khynnah skul la wan ban shimbynta da u Bah Mayral Born Syiem MLA ka Nongpoh kum u kongsan, ka kong Marian Maring kum ka symbud kongsan haka jingdonlang u Fr. Glorious Syiemlieh Parish Priest ka Umden Parish, ka Sr. Nirmalet Sd, Headmistress ka Don Bosco English School, ki nongïalam shnong, ki kmie ki kpa bad ki khynnah pule jong katei ka skul.
Naka liang ki khynnah skul kila ioh ruh ban pyni iaki jingshad bad jing rwai ban pynphuh pynphieng ïa katei ka prokram, ryngkat ki jingpyni riam.
Naka liang ka Sr. Nirmalet Sd kaba dei ka Headmistress jong ka Don Bosco English School kala ïathuh ba katei ka prokram kala ai jingkmen ïa kiba bun ki khynnah pule jong katei ka skul hadien ba kila ioh ban shim bynta haki prokram bapher bapher baroh shitaiew lynter, kaba long ruh kum ka jingpynpyngad jabieng bad ki jingmut jingpyrkhat jong ki khynnah.
Haba kren ha katei ka sngi naka liang u Bah Mayral Born Syiem u la pynpaw ka jingsngewkmen ban sakhi ïa katei ka sngi lehkmen jong ki khynnah nalor ka pule puthi ba ki pynlut por haki saw kynroh jong ki kamra klas, ba kin ioh ruh ban sei ïaka sap ka phong ka ba ki don namar nalor ka pule puthi ki khynnah ki donkam ruh ban tip ïaka sap kaba ki don.
U la ong ruh ba ki khynnah ki long ka lawei jong ka dong bad ka thaiñ, da kaba ai jingïaroh ruh ki khynnah pule ha katei ka skul kim duna shuh bad ki skul ba don sha ki ja ka sor, ha kaba ki khynnah ki shlur ban mih shakhmat ban shikbynta haki prokram bapher bapher wat haka rta ba dang rit.
Lyngba katei ka sngi naka liang u MLA u la ai mynsiem ruh ïaki kmie ki kpa ba kin long ki nongprat lynti ïala ki jong ki khun ba kin hikai haka lynti kaba dei khnang ba kin long ki khlur ba tyngshaiñ haka jingim jong ki.