Hapdeng ka jingiphuh iphieng la pynkut ïa ka Dorbar Ñiamtre ki khon ka Ri 12 Dolloi 30 Syiem ha Jowai
Jowai,Nohprah 22: Ka Seiñraij Jowai lyngba ka Ñiamtre Committee ha kane ka 21 u Nohprah 2024 kala pynlong ïaka Dorbar Ñiamtre ha madan Ryngkaw Tpep-pale Jowai.
Ha kane ka sngi nyngkong jong ka Dorbar Ñiamtre la don ki prokram ba kyrpang bad na ka liang ki khun ka ñiamtre na ki raij jong ki shnong bapher bapher kila wan ban ïashim bynta lang haka jingdonlang u Puramon Kynjing, Dolloi Elaka Jowai, ki waheh wasian bad ki khun samla ka Seiñraij Jowai.
Ha ka sngi ba bud jong ka Dorbar Ñiamtre la pynïaid ïa ka jingïalang da u Raymond Nartiang, Chairman NTC la ïoh ka nguhblei da u Mynown Chyrmang, Kñi Raij Jowai, ka jingpynher lama da u S.K. Lato, Ex-President Seiñraij Jowai katba u Hercules Toi, President Seiñraij Jowai ula ai ki kyntien pdiang sngewbha.
U Valentidio Paswet, Sangot Paswet kum uwei na ki shakri ñiam ka Raij ula ïathuh khana lyngkot shaphang ka shnong Jowai, katba ki waheh wasian kila ai ki kyntien kyntu kynpham halor ki phang bapher bapher kiba kynthup ïa u Nitanjan S.Manner, Vice-President Seiñraij Shangpung halor “ i dor ka niam wa kha ka Bei”, u Rangbah Aiban Swer, Sengkhasi Kmie halor “Ka Ñiam rukom, dustur, riti ka pyrta ïaphi”, katba u Puramon Kynjing, Dolloi Elaka Jowai halor “ Ka Ñiamtre wa hikai yei kyrpang ka jaitbru”.
Ha kane ka Dorbar Ñiamtre la pyllait paidbah ïa ka Calendar (Almanak) u snem 2025 jong ka KKC Seiñraij Jowai da u EMH Passah, Vice-President, SRJ, ha ka juh ka por la pynkup burom kumjuh ïa ki Tymmen thangbru ka Raij Jowai, kaba long kum ka dak jong ka jingsngewnguh na ka Ñiamtre Committee, Seiñraij.
La pynphuh pynphieng shuh shuh ïa kane ka Dorbar Ñiamtre da ki jingrwai bad ki jingshad na ki khun samla na ki Seiñraij bapher bapher, katba u Deibha Rymbai, Secretary NTC Seiñraij ula ïa ki kyntien ai khublei, ha kaba ka Kongka Siangbood, Langdoh ka Raij Jowai kala shim ïa ka bynta ban pynhiar ïa ka lama bad ban pynbna ba ka Dobar Niamtre ki khon ka Ri 12 Dolloi-30 Syiem ha u snem 2025 kan long haka Raij Khonshnong, Laskeiñ Block.