Hapdeng ka jingiphuh iphieng kut ka shad Behdeiñkhlam ka Seiñ Raij Jowai

Jowai, Naitung 14: Ka Shad ñiam Behdeiñkhlam kaba ju long shisien shisnem jong ka Seiñ Raij Jowai mynta ka sngi (Muchai) kala poi noh sha kaba kut hapdeng ka jingiphuh iphieng ba la shim bynta ki khun ka Raij Jowai ha ryngkat ka shad ka kmen bad ka put ka tem.
Ïa kane ka shad ñiam Behdeiñkhlam kaba ki khot ka ‘saw sngi lai miet’ ka la sdang naduh ka 11 tarik bad pynkut mynta ka sngi Muchai 14 tarik ha kaba la pyndep ïa ki jinglehniam naduh ka nguh ka dem, ka suit ka shor, ka jingpyndep ïa ka Siang ka Pha, ka jingleit rah ïa ka Symbood Khnong, ka Khnong Blai, ki Deiñkhlam, ka bam tyngkong, bad kiwei de ki kam ñiam kam rukom ba la pyndep da u Dolloi ka Elaka Jowai, u Langdoh, u Pator bad ki Waheh Wasan.
“Mynta u snem 2022 la pynlong jinglehñiam ka Behdeiñkhlam shibynta na ka jingrakhe ïa ka jingdap 50 snem ka jylla bad ka jingïoh laitluid jong ka Ri India kaba 75 snem mynta ne ka Azadi Ka Amrit Mahotsav”. Ha ryngkat ka jingïatreilang bad ka North Eastern Council (NEC) Shillong, ka tnad Tourism, ka Planning, Art and Culture ka jylla.
Baroh ki Rot kiba la wan pynpoi mynta ka sngi kut hapoh ka Syiem Aitnar kila don haduh 13 tylli, ïa kiba la shna kyrpang da ki dong bapher bapher hapoh ka Raij Jowai kumjuh na ka Seiñ Ummulong, ka seng Khasi Seng Kmie. Kine ki rot kila pyni kum ka lad ban ïada ïa ka mei mariang ban lait na ki jingjaboh, ka pyni ka jingkitkhlieh jong u Kñi ha ka ïing ka sem, kumjuh ka jingngop ha ka jingpyndonkam palat ïa ka Mobile Phone, ki jingdih ba sniew bad kiwei kiwei de.
Ha kane ka sngi pynkut ïa ka Behdeiñkhlam la wan ban sakhi lang da u Arjun Ram Meghwal Minister of State for Parliamentary Affairs & Culture jong ka sorkar kmie, u Chief Justice ka Meghalaya High Court u Sanjib Banerjee, u MP ka Rajya Sabha Dr. Wanweiroy Kharlukhi, u shongknor ka ïing dorbar thawaiñ ka jylla bah Metbah Lyngdoh, u Director General of Police ka jylla u Dr. Lajja Ram Bishnoi, IPS, u myntri sorkar bah Shanbor Shullai, ma Kyrmen Shylla, u President ka BJP Meghalaya bah Ernest Mawrie, ki ophisar sorkar nalor ka jingdonlang u President ka Seiñraij ma O. R Challam, General Secretary ma A. Sumer lem bad kiwei de.
Na ka liang ki nongïalam ka Seiñraij Jowai ki la pynpaw ka jingsngewnguh ïa baroh kiba don bynta ha kane ka lehñiam naduh basdang jong ka tad haduh bakut jong kane ka sngi, ha kaba la lah ban pyndep ïa ki ñiam ki dustur jong u longshwa manshwa.
Ka Seiñraij Jowai ka kyrmen skhem ba jingpyndep ïa ka lehñiam Behdeinkhlam ka dei kawei na ki bynta ban beh ïa ka pang ka shitom, ka bamsap bampong, kan ïada ïa ki khun samla na ka jingdih pynbuaid kum u Drug, ka kyiad, ban ïada na ka jingshah thombor ki kynthei khynnah bad kan wanrah syndon ïa ka bha ka miat, ka roi ka par ha ka ïing ka sem, ka shnong ka thaw bad ka ri hi baroh kawei.
Haba phai sha ka lehñiam ba khadduh jong kane ka Behdeiñkhlam mynta u snem naduh ka por mynstep ka la don ka Bam Tyngkong ha ïing Langdoh, ka kynting khnong ka Loompyrdi ha ïung Langdoh, ka Sympat ïung, katba haka por nongphai sngi kaba dei ka bynta ba kongsan jong ka lehñiam la pynhiai ïa ka Deiñkhlam, ka Kymbood Khnong, ka Khnong Blai bad ki rong ki rup ha la Syiem Aitnar da ka jingsakhi lang jong ki hajar ngut ki nongwan peitkai kiba dei na kylla ka Ri Khasi Jaiñtia.
Katba ha ka por janmiet la don ka Datlawakor hapdeng u Langdoh bad u Sangot Paswet ha ka jingïaleh ka kynhun u Langdoh kala long ka nongjop kaba mut ba u kba u khaw un khambha sha ka thaiñ pynthor wah mynta u snem.
Na ka liang u President ka Seiñ Raij ma O.R Challam ula ai khublei kyrpang ïa baroh kiba ïadon bynta lang ha kane ka lehniam Behdeiñkhlam mynta ka snem 2022 hadien ar snem khlem da ïoh lad satia ban ïa shim bynta laidluid jong ki khun ka raij, da kaba u ai khublei ruh ïa ki tnad sorkar kiba la pynïaid beit pynïaid ryntih ïa kane ka Behdeiñkhlam mynta ka snem.