Hapdeng ka jingiphuh iphieng kut ka noh ka IX Youth Festival cum Games and Sports Meet ka CAU

Nongpoh, Naiwieng 17: Ka lympung lehkmen bad ka jinglehkai sports jong ki samla pule ka Central Agricultural University (CAU), Imphal bala tip kum ka 9th CAU Inter-Collegiate Youth Festival-cum-Games & Sports Meet 2025 kala poi noh sha kaba kut mynta ka 17 tarik ha College of Agriculture Kyrdemkulai.
Ïa katei ka lympung ba 3 sngi la sdang haka 15 tarik ha College of Post Graduate Studies in Agricultural Sciences (CPGS-AS) Umiam hapoh ka jingïalam u Anupam Mishra, Vice Chancellor ka CAU Imphal ha kaba 420 ngut ki samla pule na 13 tylli ki tnad jong ka CAU kila shim bynta shitrhem ha katei ka prokram ba 3 sngi lynter haki jingïakop bapher bapher.
Naka liang u Dr Anupam Mishra u la ai ka jingïaroh bad pynpaw ka jingsngewkmen hadien ba ki samla kila ioh ban shim bynta shitrhem ha katei ka prokram kaba long ruh kum ka rynsan ïaki samla pule ba kin pyni bad pynpaw pyrthei ïala ka sap ka phong nalor ka pule puthi ba ki pynlut por haki kamra klas bad kane ka wanrah ruh ka jingiar ka jingmut jingpyrkhat, ka jingshlur ba kin mih shakhmat.
Haba ai jingkren ha kane ka sngi kum u kongsan, u Kamkhya Prasad Tasa kum u MP ka Parliament u la ai ka jingaroh ïa ka CAU Imphal kabala pynlong ïa kane ka tamasa ki samla da kaba pynlong ïa ki jingïalehkai bad ki jingïakop bapher bapher ba ki samla ki ioh lad ban sei madan ïa ki sap ki phong ba ki don nalor ba ki hap ban pynlut por ha kam pule.
Kiwei kiwei kiba la ïa don lang ha kane ka sngi ki kynthup ïa u Amitav, Roy, Deputy Inspector General, Border Security Force, Shillong, Meghalaya , u Dr. S. Hazarika, Director, ICAR-RC for NEH Region, Dr. A.K. Mohanty, Director, ICAR-ATARI, Zone-VII, Umiam, Dr. G. Kadirvel, Director, ICAR-ATARI, Zone-VI, Guwahati, u Pawan Tiwari, Pragjyotish University, Guwahati, u Vasant Pandit Ji, Deendayal Research Institute, ha kaba ki la ai jingkren ban kyrshan bad ban ïaroh ïa kane ka tamasa ki samla bad ai khublei ruh ïa baroh ki nongjop.
La pynkut ruh ïa kane ka tamasa da kaba sam ïa ki khusnam sha ki nongjop ha ki jingïalehkai bapher bapher ba la pynlong ha kane ka tamasa bad kynthup ruh ka jingsam ïa ki syrnod kaba long kum ka jingpynshlur halor ka jingïalehkai bha jongki ban poi sha ka jingjop.