Shillong, Risaw, 24: U rawon na ka shnong Nongumlong, Upper Shillong u la hap ha kawei ka thwei kaba don ha ka wah Weiuphar kaba dang hap hapoh u pud u sam jong ka shnong Nongumlong.
Kane ka la jia ha ka step sngi Thohdieng. Une u rawon uba la 35 snem eiei ka rta u dei uba la tip kyrteng kum u Bah Laitstar Nongneng Daloi uba la leit khwai bad ki arngut ki paralok ha ka por 10:00 baje eiei mynstep.
Ka daw ka jinghap jong u ka long namar ka jingbtuit ha ka por ba ki dang tong dong bad tang shu hap sha thwei u la jah syndon jlang.
Tang shu ïoh jingtip halor kane ka jingjia, ka kynhun Search and Rescue Team (SRT) na Shillong bad ki Pulit ka Jhalupara Outpost ki la hiar sha kane ka jaka ban wad ïa ka met jong u rawon bad tang hadien katto kane kynta ki la lah ban sei ïa ka met jong u kham sharum na ka jaka ba u la hap.
Ïa ka met jong u rawon la pynkit noh sha ïing sah jong u sha Nongumlong.
