Nongpoh, Jylliew 17 : Kumba ki paidbah nongshnong shnong ka Shnong Borbhuin ba hap hapoh ka Hima Mylliem bad ha ka jingpeit jingkhmih ka Raid Marwet ha ka thaiñ Byrnihat kim don shuh ïa u rangbah shnong ba pura, kaba dei hadien ka jingkhlad noh u rangbah shnong, u Bah Adris Maring ba la jan kot mynta shi snem ei ei bad ban ioh ïa u Rangbah shnong ba pura la pynbeit ban don ka jingjied rangbah shnong mynta ka sngi, hynrei kane ka jingpynbeit ban jied rangbah shnong thymmai ka la pulom noh, kaba dei hadien ba la poi tang uwei u rangbah uba thmu ban ïa khun na ka bynta ban ioh bat ïa ka kam rangbah shnong ha katei ka Shnong Borbhuin.
Kum ban pynkynmaw, kane ka shnong la hap ban jied Acting Rangbah shnong shipor ïa u Bah Dwijen Ronghang, kaba dei hadien ka jingkhlad noh u rangbah shnong barim bad kane ka la neh mynta la jan shisnem, hakaba hakaba khatduh ka Hima bad ka Raid kila pynbeit ban jied rangbah shnong thymmai noh mynta ka sngi Saitjain jong ka 17 tarik u Jylliew 2023, hynrei kane ka jingthmu ban jied Rangbah shnong ka la pumom noh, kaba dei hadien ba la wan poi tang uwei u rangbah ba la tip kyrteng kum u Bah Purma Lapang uba thmu ban ïa khun ïa ka kam rangbah shnong bad katba kiwei pat ki kyrtong kiba thmu ban ïakhun rangbah shnong kim shym la la poi satia ha kane ka sngi.
Na ka liang u Syiem ka Raid Marwet, u paiem Ken Syiem ryngkat ki Longsan mansan mynta ka sngi ki la wan poi ha ka Shnong Borbhuin ban pynlong ïa ka jingjied rangbah shnong, kaba dei katkum ka jingbthah ka Hima Mylliem ba la buh ïa ka tarik ban jied rangbah shnong mynta ka sngi, hynrei la hap ban pynsangeh noh kaba dei hadien ba ka bor shnong ka la ai jingtip sha ka Hima ba dei ban pynsangeh shuwa ïa kane ka jingjied rangbah shnong kaba dei katkum ka jingkwah u paidbah ban rah noh sha kawei ka tarik ne bnai.
Na ka liang u Syiem ka Raid Marwet, u Paiem Ken Syiem, wat la thmu ban pynlong ïa ka jingjied rangbah shnong mynta ka sngi bad hadien ba la ai jingthoh da ka shnong ban pynkynriah noh ïa ka tarik jied rangbah shnong la pynkynriah ne kin sa pynbeit pat ha kawei ka tarik ban jied rangbah shnong ba pura ha kane ka shnong Borbhuin.
Shuh shuh, u Paiem Ken Syiem, u la kren ruh ha kane ka sngi, kumba ki nongïalam shnong barim ki la ai da ka jingthoh bad pyntip ban pynsangeh shuwa ïa kane ka jingjied rangbah shnong, u la sngap ïa ka sur ki paidbah bad na ka liang jong u ruh kum u Syiem un sa phah ïa ka kaiphod sha ka Hima Mylliem bad kaei ka jingbthah ka Hima Mylliem yn sa leh ïa kata namar ban jied ïa ka kam rangbah shnong ka dei ban long beit da ka rai jong u paidbah babun balang, la bynrap u Paiem Ken Syiem.
