Shillong, Naitung, 14: Ki 47 ngut ki nongshong shnong jong ka shnong Upper Tarabari, kiba dei na ka jaidbynriew Garo kiba la shah tait shnong na ka daw ba ki pyrshah ïa ka jingpynïasoh bad ka Jylla Meghalaya ynda la pyntreikam ïa ka MoU kaba la ïasoi da ka Sorkar Assam bad Meghalaya ha ka sngi Palei kin ïoh ïa ka jaka sah ha Upper Tarabari hadien ba ki bor synshar distrik ki la lah ban wanrah ïa ka jingsngewthuh jingmut ha kane ka shnong, la ïathuh u Deputy Commissioner jong ka Kamrup u Kailash Karthik N.
Ula ïathuh ba ki Pulit Assam bad ki bor synshar District jong ka West Khasi Hills ki la thaw da ka Peace Committee ha Upper Tarabari hadien ba ka la don ka jingjurip na ki arliang mamla.
“Ka Peace Committee kan shim ïa ki sienjam ban wanrah biang ïa ka suk ka saiñ bad ruh ban peit pyrman ïa ka jinglong jingman ha kane ka shnong ba kum kane kan ym wan jia shuh,” ong u Circle Officer jong ka Boko Revenue Circle u Diwas Bordoloi.
Ïa kane ka Peace Committee la khlieh da u Luwin Marak kum u President, u Rottal Sangma kum u Secretary bad ki dkhot ki kynthup ïa u Marjan Sangma, u Lingbat Marak, u Barminton Sangma bad u Kraison Marak.
“Ka Peace Committee kan peit pyrman ïa ki kam khappud ha Upper Tarabari bad ïa ka jingtreikam jong ka pat yn peit pyrman da ki bor synshar jong ka sorkar Assam bad ka jylla Meghalaya,” ong u Diwas.
Ha ka jingleit jurip, la sakhi lang da bor synshar district ka jylla Assam bad na ka Jylla Meghalaya ba kynthup naduh u Diwas Bordoloi, u Phanindra Nath uba dei u Officer-in-Charge jong ka Boko Police Station , u Bikram Basumatary uba peit ïa ka Hahim Police Outpost, u Goalon K Sangma uba peit ïa ka Malangkona Police Outpost, West Khasi Hills District bad ki nongïalam jong ka All Rabha Students Union (ARSU), ki Pulit CRPF. Ha kane ka jingleit jurip ki la pynlong ruh ïa ka jingïalang ha madan lehkai jong ka shnong.
Shuh shuh ha kane ka jingïalang la ïashim bynta da ki nongshong shnong jong ka Watre Rongchang, Balsrik bad Walkam jong ka Upper Tarabari.
Ki paid nongshong shnong ki la pynpaw ha kane ka jingïalang ba ki kwah ban wan ïasoh bad ka Meghalaya da kaba dawa ba dei ban pynlait noh ïa ki laingut kiba la shah kem na ka daw ba ki dawa pisa katkum ka jingkynnoh kito kiba kwah ïasoh bad ka Assam
Na ka liang u OC ka Boko Police Station u la kular ba kin sa peit ïa kane bad ka jingpynlait ruh kan long katkum ki kyndon jong ka aiñ.
U Secretary jong ka Jarihat ARSU u Barun Rabha u la kyntu ïa ki ar Sorkar ba kin pyndep pura noh ïa ka jingpynbeit pud khnang ba kum kane ka jingjia kan nym jia shuh
“Kam don kano kano ka jingkylli kaba ngin leit ïasoh bad ka Meghalaya namarba naduh ki kpa tymmen jong ngi ki dei shibynta bad ka jylla Assam bad shen ngin leit ai dorkhas sha ki Myntri Rangbah jong ki ar tylli ki jylla ban pynpaw ïa kane ka jingsngew jong ngi,”ong u President jong ka Garo National Council (GNC), Assam u Enindra U Marak.
