Shillong, Jylliew 21 : Ka jingïalehkai OC Blue Shillong Premier League 2021-22 ha ka sngi ba ar hapdeng ka Mawlai SC bad Shillong Lajong FC la hap ban pynsangeh noh hadien ba la ïaid 60 minit na ka daw ka jinglang um ka madan Third Ground na ka jingther kynsan u slap.
Ha kane ka jingïalehkai ka Mawlai SC ka la lamkhmat da 1-0.
Ïa ka shi kol na bynta ka Mawlai SC la thep da u Donborlang Nongkynrih ha ka jingïalehkai ba ïaid 30 minit uba la ïoh ban khyrwit najngai ka dieng kol.
Ka jingïalehkai ka long kaba ïakhaid bha hapdeng kine ki ar tylli ki team watla ka Shillong Lajong ka la shah thep kol pynban ka la ïakhun tyngeh ban pynphai, hynrei haduh kaba kut jong ka kylla step ka khlem lah ban thep kol. Ka Shillong Lajong FC ka la ïoh ka kabu kaba biang bha ha ka minit ba 40 hynrei ka bol ba la khyrwit da u Sangti Janai Shianglong ka la lait salit na u dieng kol.
Haba wanphai sha ka kylla miet, ka jingïakhun ka la nang ïathnem ha baroh arliang bad dei ha ka kylla miet u salp ba jur u la wan ban hap bad ka jingïalehkai ka la sdang ban thut na ka jinglang um ka madan.
Hapdeng ka jinghap slap, ka jingïalehkai ka la nang ïaid shakhmat hynrei na ka jingnang jur u slap bad lang um ka madan la hap ban pynïasangeh noh ïa ka jingïalehkai tang ha ka minit ba 60.
Katkum ki kyndon jong ka SPL, ba ïa ki minit ba dang sah yn sa pynïalehkai biang bad ïa ka tarik yn sa pynbeit hi da ka Shillong Sports Association.
Kumba ka long haduh mynta, ka Mawlai ka la jop ïa ka jingïalehkai ba nyngkong da kaba pynliem da 2-0 pyrshah ïa ka Nangkiew Irat SC katba ka Shillong Lajong ka la mad nam rem da 1-0 ha ka Langsning FC.
Ka jingïalehkai mynta ka sngi Balang kan long hapdeng ka Langsning pyrshah ïa ka Nangkiew Irat ha ka por 4 baje janmiet.
