Hap pynphai noh ka Meghalaya ïa ka 200 klur lada ym lah pyntreikam ia ka Railway Project

Shillong, K’Lyngkot 22 : Ka sorkar jylla ka hap ban pynphai noh ïa ka pisa ba 200 klur tyngka ba la ai da ka sorkar pdeng lada jia ba kam lah ban pynbeit noh mardor ïa ka ishu kaba ïadei bad ka jingshim jaka na ka bynta ban pyntreikam ïa ki ar tylli ki projek pynpoi lynti rel.
Haba pyntip ïa kane, u Myntri Rangbah ka Jylla, Conrad K Sangma u la ïathuh ba ha ka jingkynduh bad u Myntri ka tnad Railway ka sorkar pdeng u la pynpaw ïa ka jingsngewkhia halor ki projek lynti rel ha Byrnihat bad ruh ha Shillong.
“Nga la dep pynpaw bad kren shai ha u (Railway Minister) ba ngi donkam ban ïoh shwa ïa ka jingmynjur lang jong uba bun balang halor kane bad ba kan ym ïahap satia ïangi ban thom da ka bor ha ki phang kiba kum kine. Nga la banjur ruh ba donkam ban syllok lang ïa ki shnong bad ki paidbah haba shim ïa ki rai kiba kongsan kiba kum kine,” u la ong haba kren bad ki lad pathai khubor.
Lah ban kdew hangne ba ka sorkar pdeng ka la tyrwa ar tylli ki projek lynti rel ha ka jylla, kata kynthup ïa ka lynti rel Tetiala – Byrnihat kaba don 22 Kilometer bad kumjuh ïa ka lynti rel ba 108 KM na Byrnihat – Shillong.
Hynrei kine ki projek lynti rel ki la kynduh mawsiang noh na ka daw ka jingpyrshah kaba jur na ki kynhun bapher bapher kiba pynpaw ïa ka jingsngewkhia ïoh ka wan ka jingrung kyrthlep ki mynder.
U Myntri Rangbah u la ong ruh, “Na ka liang u Myntri u la ïathuh ba shen un sa phah da ka shithi sha nga ba hapoh lai ne hynriew bnai lada kane ka ishu ym lah ban pynbeit kumta ïa kane ka 200 klur tyngka ka pisa kaba la ai na ka bynta ka bai shim jaka kaba don bad ka ophis DC naduh u snem 2007 ei ei, yn hap ban pynphai biang. Kaba mut ba ngi hap ban pynphai noh ïa katei ka pisa bad kaba ar kaba kham long kongsan ka long ba ïa kane ka projek yn sa pynduh noh.”
U Myntri u la ïathuh ba u la dep kyrpad ïa u Myntri ba un ai por shwa ba un ïa kren bad syllok hynrei la ïathuh ba ka por ka la khim bha. U ong ruh ba watla um shym la kdew katno bnai hynrei na ka liang u Myntri ka sorkar pdeng u la shu ong beit ba ha ki khyndiat bnai un sa thoh sha u shen.
“U la ong ruh ba lada donkam dalade hi un wan ban kynduh ïa ki paidbah ban ïa kren halor ka jingdonkam jong kane ka projek bad ngin sa peit kumno kane ka kam kan ïaid shakhmat,” u la ong.
Nalorkata, u Conrad u la ïathuh ba kumba ka paw hi, u Myntri ka Sorkar Pdeng u la kdew shai ba lada ka jylla kam lah ban pyntreikam shakhmat ïa kane ka projek kaba poi da ki hajar klur kaba don jingkyrmen ban kyntiew ïa ka ïoh ka kot ïa ka jylla yn hap ban pynduh noh.