Tura, Jylliew 24: Da ka jingthmu ban ïaleh ban pynkhuid biang ïa ka dam Ganol namar ka jinglang jong ki jaboh jabaiñ na ka daw u lapbah, ki bor pynïaid district jong ka West Garo Hills hapoh ka jingïalam u Deputy Commissioner u Jagdish Chelani, ki la sdang ïa ka jingpynkhuid ïa kane ka jaka kaba la lang ki jaboh.
Kumba 65 ngut ki briew na ki kynhun bapher kynthup ïa ka Municipal, SRDF, Block staff bad Project staff jong ka dam ki la trei shitrhem ban pynkhuid ïa ki jaboh kiba don katei ka wah kiba la wan tuid na ka Wah Ganol sha ka damsite jongka Ganol Hydro Electric Project.
“Ngi la buh por ba hapoh 72 kynta ban pyndep ïa katei ka jingpynkhuid” ong u Deputy Commissioner bad ula ong pat ba ïa kane ka kam yn lah ban pyndep ha kine ki 3-4 sngi ki ban wan.
Ula pynpaw ïa ka jingdiaw ba namar ka jingdum jong ka suiñ bneng ka lah pat ban ktah ïa ki kam ki jam ha ka ban lah ban pynkhuid ha ka por kaba la buh ïa katei ka bynta ba jaboh jong ka wah.
ïa kitei ki niut bad ki jaboh kiba la wan tuid sha dam la lum la lang shi jaka bad yn pynkit ïa kitei baroh sha ki jaka lum niut.
Namar ka jingjur jong ka jingpyntuid ïa ki niut, na ka liang ki bor district kin daiñ kuna T.1 Lak ia ka Rongram Bazaar Committee.
U DC ula ong ba katei ka jingdaiñ kuna ka dei kum ka jingpynkynmaw ïa baroh ki Market Committee bad ki kynhun kiba don bynta ba ka long kaba kongsan bad ka dei ka kamram ban pynneh iaka jingkhuid jingsuba jong ka wah bad kino kino kiba pynjaboh kin shah pynshitom katkum ki kyndon aiñ.
Na ka bynta ka jingshngaiñ jong kitei ki nongpynkhuid, kumta ki la shim ïa ki lad ban ïada ïalade da kaba phong ïa ki jaiñjri, ki but, ki jingsopkti bad kiwei kiwei bad la pyndonkam ruh da ki Fiber Boat ban ïoh tam ïa ki jaboh bad ïa ki niut ki nier kiba don ha katei ka wah.
U DC ula ong, ba yn pynsngewthuh ruh ïa ki paidbah ïa ka jingdonkam ban tehlakam khnang ba kum katei ka jingjia kan ym jia shuh bad ki la pynkhreh ruh ïa ki jingthmu ban pyntreikam shi rta na ka bynta ban ïada ïa ka nongbah bad district na kum katei ka jingjia.
U Chelani ula ong ba ki paidbah ki dei ban bret ïa ki jaboh ha ki jaka bret niut khnang ba ki niut kin ym ïoh ban tuid ha shi lynter jong katei ka wah bad ka tnad Public Health Engineering ka shim ïa ki lad ban pynkhuid ïa ka um hashwa ban pyllait sha kawei pat ka jaka.
