Hap pule kot Khasi bad Garo ki heprit ba sdang ban leit skul haduh klas I

Shillong, Nohprah 20 : Ka Sorkar Jylla ka la mynjur ïa ka State Curriculum Framework na ka bynta ka jinghikai ha ki jaka pule na ka bynta ki khynnah kiba dang shu sdang skul da kaba wanrah ïa ka syllabus kaba la pynkylla na ka bynta ki khynnah kiba dang thmu ban sdang skul haduh klas 1 ryngkat bad ki kot pule kiba thymmai.
Kumta nangne shakhmat baroh ki heprit ki hap ban pule lang ïa ki kot ha ka Ktien Khasi bad Garo ruh.
“Ka kynhun myntri ka la mynjur ïa ka state curriculum framework na ka bynta ki heprit ba dang sdang skul. Kane ka syllabus na ka bynta jong ki (preschool) bad klass 1 ka la ïoh ïa ka jingmynjur bad kumta na ka liang ka sorkar la wanrah ruh da ki kot ba thymmai,” ong u Myntri Rangbah haba kren bad ki lad pathai khubor.
Shuh shuh u la bynrap ruh ba kane ka framework ka banjur ha ka jingpynroi ïa ka jinglong ki khynnah da kaba pynrung ha ki ïa ka rukom pyrkhat kaba kongsan ba kin san ha ka jingtip ïa ka tynrai bad ka kolshor.
“Ha kum kine ki por ba ki dang lung, ngi kwah ban pynleit jingmut ha ka rukom pynsan ïa ka jinglong jong ki, khamtam ki jinglong ba kyrpang kum ha ka kolshor, ka jingtip ïa ka mynnor jong ka jylla,” u la ong.
Shuh shuh u la bynrap biang ba da kaba leh kumne, baroh ki heprit kin hap ban nang lang ïa ka Ktien Khasi bad Garo.
“Ngi la buh bakane kan long kaba kongsan na ka bynta ki heprit ba kin nang lang ïa ka Ktien Khasi bad Garo,” ong u Myntri Rangbah da kaba kdew ba ki kot na ka bynta kine baroh ar tylli ki Ktien ki la dei shi bynta jong ka curriculum.
La iathuh ruh ba watla bun ki skul ki la dep sdang ïa kane ka syllabus na ka bynta ka samoi long skul kaban wan hynrei ïa ki kot baroh ka jingpyntreikam lut ïa baroh ki kot kan long beit naduh u snem ba bud.