Shillong, Iaiong 16 : Kawei ka trok 407 ka la hap ha wah Umngot najan Jingkieng Dawki ha ka janmiet Sngi Palei bad kat haduh ba thoh ïa kane ka khubor mynta ka sngi ki bor pulit, ki SRDF bad NRDF kim pat ïoh sei ïa ka met jong u nongñiah namar ba dang saw bad heh palat ka um na ka jingjur slap.
Kane ka jingjia ka la jia ha ka por ba kane ka trok ka dang wan phai na Bangladesh hadien ba la dep pynhap mawleiñ namar la ïathuh ba kane ka trok ka dei kaba kit maw na Pynursla bad leit pynhap sha Bangladesh.
La ïathuh ba na ka liang ki bor pulit ki la pyrshang ban kwai ïa ka trok hynrei ym pat lah ban sei satia bad ïa u nongniah ruh ym pat lap namar ba jngut palat ka um bad kim pat lap dien shaduh shano ka um ka la rong ïa u nongniah ruh.
Ki pulit ki la ïathuh ruh ba kat kum ka jingtip ba ki ïoh ha katei ka trok don tang u nongniah marwei ha ka por ba hiar sha Bangladesh tangba wat la katta ruh ki dang pyrshang hi ban wad jingtip bniah ïoh don kiba kiew lang bad u ha ka trok.
