Hap ka jeep sha riat ha Makoibari, khlad noh u rangbah katba dang pyrshang ban pynim ïa ka kali

Nongpoh, Rymphang 10: Ha kawei ka jingjia aksiden kaba sngewsih, uwei u rangbah u la duh noh ïa la ka jingim hadien ba ka kali (Jeep) kaba u ñiah ka la hap sha riat ha ka shnong Makoibari, Mawdiangum, ha Ri-Bhoi District.
Katkum ka jingtip ba la ïoh lum, kane ka jingjia ka la jia ha ka nohphai sngi kumba ha ka por 1:20 baje eiei, ha kaba u Bah Rymphangsngi Blah, 65 snem ka rta, u nongshong shnong ka Saiden, Ri-Bhoi District, u dang mih na Makoibari ban leit sha surok bah ha Mawdiangum da ka Jeep kaba don ïa u number ML-10-1027.
La ong ba ha katei ka por, ka kali ka la ïap kynsan. U nongñiah u la pyrshang ban pynnoh ïa ka kali da kaba pynkylla ïa u gear ban ïoh pynim ïa ka, hynrei namar ka jingbym lah ban tehlakam ïa ka kali, ka la hap syndon sha riat ryngkat bad utei u rangbah, haduh ba un da mynsaw jur.
Tang hadien katei ka jingjia, ki pulit ka Nongpoh Traffic Police ki la poi mar mar sha katei ka jaka bad la pynkit ïa utei u rangbah sha Bethany Hospital Nongpoh na ka bynta ka jingsumar. Hynrei, ki doctor ki la pyntip ba u la khlad noh shuwa ban poi ha hospital namar ka jingmynsaw kaba jur.
Na ka liang ki bahaïing, ki la kyrpad ban pynlait ïa ka post-mortem. Hadien ba la pyndep ïa ki kyndon baroh katkum ka aiñ, ki pulit ki la aiti noh ïa utei u rangbah sha ki bahaïing ba kin pyndep ïa ka jinglehniam ba khatduh.