Shillong, Jylliew 12 : Ka Rangdajied United FC bad ka Khliehmawlieh kin hap ban ïakhun tyngeh beit triang mynta ka sngi ha ka jingïalehkai semifinal kaba ar (second leg) ban wanphai da ka nam jop lada ka kwah ban rung sha ka phainal jong ka Meghalaya State League (MSL) 2023.
Ka Rangdajied United ka la mad nam rem da 0-3 kol ha ka Shillong Lajong FC ha ka jingïakhun semifinal kaba nyngkong kaba la long ha ka taïew ba dang shu dep katba ka Khliehmawlieh ka la rem da 0-1 kol ha ka Mawlai.
Baroh ar ki jingïalehkai yn sdang ha ka por 3 baje janmiet ha la ki jong ki jaka ïalehkai. Ka Shillong Lajong kaba dei ka lahduh (Defending champion) kan sa aireng pyrshah ïa ka Rangdajied ha madan MDSA Ground ha Mawkyrwat, katba ka Mawlai kan pdiang ïa ka Khliehmawlieh ha Stadium First Ground jong ka SSA kaba don ha Polo, Shillong.
Ka leg kaba nyngkong jong ka semifinal ka la dep ha ka sngi Saitjaiñ. Ha Jowai, ka SLFC ka la khur ïa ka nam jop pyrshah ïa ka Rangdajied da 3-0 ha ka jingïalehkai ha Kiang Nangbah Stadium. Katba ka jingïalehkai ha Tura ka long kaba mar ïakhaid bha ha kaba ka Mawlai ka la jop tang da shi kol ïa ka Khliehmawlieh (1-0).
Ka RUFC, kaba wan ba ar bad rem noh ha ka Shillong Lajong ha ka samoi ba lah dep jong ka MSL, kan sa ïalehkai bha khamta ba ka la shah thep ar kol ha ka kylla miet bad kaba la ktah shibun ha ka semifinal kaba nyngkong. Hynrei ym lah ban tip lypa namar ba kane ka kynhun ruh kam dei kaba tlot bad ïa ka jingjop bad jingrem ka shong eh ha ka jinglah jong ki nongïalehkai ba kin pynpaw bor mynta ka sngi, bad na ka liang ka Shillong Lajong ruh la thikna ba kam ym ailad hynrei kan ïakhun tyngeh beit triang ban ïoh ïa ka jingjop.
Ha nongbah Shillong, kan dei ka sien kaba nyngkong ba ka stadium jong ka SSA kan ïoh ban pynïalehkai ïa ka MSL bad kadei ka sien kaba lai ban ïoh pynlong ka jingïakhun ha katei ka stadium naduh ba la siang ïa u phlang artificial turf uba thymmai.
Watla ka madan kan dang long kaba thymmai ïa baroh ar ki kynhun, ka Mawlai ka don ka kabu khamtam ba ka ïalehkai ha la ïing bad ruh la khmih lynti da ka jingwan ban ai mynsiem ki nongkyrshan. Haduh mynta, ka Mawlai kadei ka kynhun kaba la jop baroh san sien ha ki jingïalehkai group stage, (kaba dei tang kane ka team kaba lah ban khur ïa kine ki nam jop), ba kynthup ka jingjop ha ka jingïalehkai semifinal kaba nyngkong ha Tura, ha ka jingïalehkai jong kane ka lympung kaba heh hapoh ka jylla.
Ka kynhun ïalehkai pyrshan (Khliehmawlieh) ruh ka la lah ban ïalehkai bha ha ka semifinal kaba nyngkong bad ki rangïalehkai jong ka ki la trei shitom bad pynshohbiej ïa ki nongpeitkai ha katei ka jingïakhun semifinal kaba nyngkong. Lada jia ba ka la lah ban pynliem ïa ka Mawlai mynta ka sngi bad rung sha ka final, kan dei ka history na ka bynta jong ka bad ïa ka MSL.
