Hap ïakhun CUET ki Samla pule ba kwah pule UG-PG naduh u snem 2022-2023

Shillong, Lber 23: Ki Samla Pule hapoh ka Ri baroh kawei kynthup ka Jylla Meghalaya, kin hap ban ïakhun noh ïa ka Common University Entrance Test (CUET) ban ïoh leit pule Undergraduate/Post Graduate ha ki Univeristy naduh u snem 2022-2023 khlem da pynshong nongrim shuh na ki marks ba ïoh ha ka klas XII.
Kat kum kane ka Rule thymmai jong ka University Grant Commission (UGC), kane ka Common University Entrance Test (CUET) ban rung pule Undergraduate/Postgraduate kan long noh ha ka taiew ba nyngkong jong u bnai Naitung 2022 bad yn pynlong ïa ka da ka National Teast Agency (NTA).
Ïa kane ka eksam ban pynïaid da ki kor Komputer, yn pynlong ha ki 13 tylli ki ktien: ka English, Hindi, Gurarati, Bengali, Kannada, Malayalam, Marathi, Odia, Punjabi, Tamil, Telugu bad Urdu.
Haba pynthikna ïa kane, u Myntri ka Tnad Pule Puthi ka Jylla ula ong ba ka Common University Entrance Test (CUET) ka dei kawei na ki kyndon jong ka National Education Policy kaba la pyntreikam mynta hapoh ka Ri.
Haba kylli, u Myntri ula ong “Ka jingthmu (pyntreikam ïa ka CUET) jong ka Sorkar India ka long kaba bha hynrei ka don khyndiat ka jingsngew na ka liang ka jong nga namar ïa ki eksam yn pynlong na ki kot jong ka National Council of Educational Research and Training (NCERT) kaba mut ba ki Kot ba pynmih na Jylla la ka dei ka Meghalaya, Assam ne Karnataka kin ym treikam shuh. Kane ka don ka jingktah ïa ki khynnah ka Jylla namar ba kin hap ialeh ïa ka eksam tang da ki kot NCERT”.
Kat kum ka jingong jong u, kane kan buh bha ïa ka jingeh ïa ki khynnah nongkyndong ki bym don ïa ki lad jing iarap (facilities) kiba biang.
“Ngi la ïohi ha ka por ba pyntreikam ïa ka Joint Entrance Examination (JEE) na ka bynta kiba pule Engineering bad kumjuh ruh ïa ka National Eligibility-cum-Entrance Test (NEET) jong kiba pule Doktor, ki khynnah jong ngi kila shem ïa shibun ki jingeh khamtam kiba na nongkyndong. Ngi ïohi ruh ïa ka jingmih ki Coaching Centre ki bym ithuh ithaw shuh” ula ong.
Hynrei u Myntri ula ong “Ngam kwah ban kynthoh tham shibun ïa kane namar ba ka UGC ka dang shu pynbna ïa kane ka rai bad ngim pat tip satia ïa ki kyndon kiba don ha kane ka jingpynbna”.
“Ynda ngi la ïoh ïa ka hukum, ngin sa shong bishar bad na ka liang ka Sorkar ngin sa leh ïa kaei kaba dei ban leh na ka bynta ka jingbit jingbiang jong ki Khynnah pule jong ngi. Ngin sa peit ïa kaei ka cut of marks, kaei ka Reservation bad ngin sa leh ïa kaba donkam” ula bynrap.
U Myntri ula ong ba kat kum ka jingpynbna jong ka UGC, kane ka CUET kan treikam tang ha ki University ka Sorkar India bad ong “Ngi hangne ngi don ka North Eastern Hill University (NEHU) bad ngin sa peit kumno ngin leh ban nym buh ïa ki khynnah hapdeng ka jingeh”.