Shillong, Rymphang 21: U Kyrtong ka Congress na Laitumkhrah-Malki u Bah Manuel Badwar ha ka sngi Thohdieng u la kyrpad ïa ki political party, kiba dawa ban wanrah ïa ka Article 371, ba ki dei ban pyrkhat bad ban ïasyllok ïa kane ka mat ha ka meij ha ka jaka ban leit beit sha ki paidbah ban pynsngewthuh ïa ki paidbah halor kane ka bynta bad ka subject.
Haba kren sha ki lad pathai khubor hadien ba u la dep ban thep ïa ka vote jong u, u Bah Badwar u la ong, “Nga kyrpad ïa kito ki party, kiba dawa ïa ka Article 371 ba kin ïasyllok ïa kane ka kam ha ka meij jingïakren bad ym dei ba kin shu leit beit sha ki paidbah da ka jingsngewthuh jong ki halade.”
“Kum kine ki subjek ki donkam ïa ka jingïasyllok lang jong baroh hynrei ban leit beit sha ki paidbah bad ong ba ngi dawa kane ka pyni ba kim pat rangbah ka jingmut jingpyrkhat. Phim lah ban ong katba ba phi kwah ba ka dei ka hok. Ka Politic kadei shaphang ka jingïasyllok na ka bynta ka bha ka miat jong ki paidbah,” u la ong.
U Bah Badwar u la ong ba ha ka jingshisha ka Article 371 kan tlot bor pynban ïa ki autonomous district council (ADCs) bad pyntlot ïa ki bor ai jingïada ba la ai sha ki trai trai muluk lyngba ka Sixth Schedule ka riti synshar jong ka ri India.
“Namar kata kan bha ban kiar naba shim ïa kum kine ki rai bad ailad ïa ki riewshemphang ban ïasyllok bad ban shim ïa ka rai kaba bha kaba ïamon lang da baroh. Lada nga dei ban ïatai halor kane ka subject, ngan long beit uba pyrshah jur ïa ka Article 371,” u la bynrap.
Haba pynpaw ka jingsngewskhem ban jop ïa ka elekshon, u nongïalam ka Congress u la ong, “Ngi la rung sha manla ki thliew ïing bad ngi la pynpaw ïa kiba bun ki mat ba ka party ka don. Namar kata ngi sngewskhem ban jop ha kane ka elekshon.”
Haba pynpaw ïa ka jingsngewkhia haba ïohi ïa ki briew ha Nongmynsong kiba ap shabar ka polling station u la ong, “Ka long kaba sngewsih ba ki dang don ki briew kiba dang ap pisa bad ïa kane hap kynnoh ïa ka jingnang jingstad naba ki dang shimpor ban sngewthuh bad ki nongmihkhmat na kane ka thaiñ ki dei ban kiar na ka jingpyndonkam ïa ka pisa.”
Shuh shuh u Bah Badwar u la banjur ruh halor ka jingdonkam ki ADC halor ka jingdonkam ban ai jingmut na ka bynta ban kyntiew ïa ka pule puthi bad kim dei tang ban long kum ki tnat kiba shu lum khajna.
