Shillong, Ïaiong 09: U Nongïalam ka BJP bad Myntri barim ka Sorkar Bah A.L.Hek ula ong ba ka Sorkar Jylla ka hap ban bishar bha ïa ki kam ba ka leh dalade ïalade hadien ka jingbyrngem pynbthei bomb da ka kynhun kiengatiar bala thaw da ki samla ka khlem kam khlem jam.
“Ka dei ka jingbahkhlieh tang jong ka Sorkar Jylla ban leh eiei ïa baroh ki jingud jingnam khamtam ha ka jing bym ïoh kam ïohjam” ong u Bah Hek ula dei uwei na ki Nongaibuit jong u Myntri Rangbah ka Jylla Conrad Kongkal Sangma haba ïakren bad ki nongthoh khubor.
Kat kum ka jingong jong u ‘Lada ngim shym la ïaid bakla hangno re hangno, ka Ïingkashari kan nym tuklar satia” haba thew sha ka hukum jong ka Ïingkashari Meghalaya High Court. “Namar kata ngi donkam ban shong bishar ïa ki kam ba ngi leh halor kane ka kam” ula bynrap.
Ha ka shithi bala phah lyngba ka email sha u Myntri Rangbah ka Jylla dang shen, ka kynhun “Lawei ba Phyrngai’ kaba kam ïalade kum ka kynhun lehnoh bala thaw da ki 37 ngut ki samla khlem kam, kala byrngem ban pynbthei bomb manla ka taiew naduh ka 1 tarik Jymmang 2022.
Haba kyntu ïa kane ka kynhun ban jied ïa ka lynti kaba dei ban pynbeit ïa ka jingeh ha ka jingbym ïohkam ïohkjam, u Bah Hek ula ong “Kawei ka jingbakla kan ym lah ban pynbeit ïa kawei pat ka jingbakla. Ka dei tang ka lynti kaba dei kaba lah ban pynbeit ïa ki jingbakla baroh”.
‘Wan ha ka lynti kaba dei, ngi lah ban kren ïa u Myntri Rangbah, ngi lah ban kren ïa ka Sorkar Jylla lada ki don ïa kino kino ki jingeh. Lada ki sngew ba ki shah leh beiñ, ka Sorkar kan hap ban sngap namar ki don ïa ka hok ban dawa ïa ka Sorkar ba kan leh eiei” ula bynrap.
U Bah Hek ula ong ba kane ka kam kam shym la mad jingeh tang da ki 37 ngut ki samla ba khlem kam haba ong “Ki lah ban don palat ïa ka 37000 ngut ki samla ki bym pat ïohkam ha ka Jylla. Namar kata, ngi hap ban sngap ïa ki 37000 ngut ki samla khlem kam”.
“Hato don tang 37 ngut ki samla ba khlem ïohkam ha ka Jylla. Ki lah ban don palat ïa ka 37000 ngut ki bym shym la ïohkam ïohjam ha Jylla” ula ong.
Haba kylli, u Bah Hek ula ong ba ki paidbah kim lah satia ban shu kynnoh ïa ka BJP namar ka party kam shym la ïoh ïa ka jingkyrshan ba pura ban lah pyntreikam ïa ka manifesto.
“Hynrei, ngi dang shimkhia ïa ka mat halor ka jingbym ïohkam ïohjam ha ka maniesto jong ngi bad lada ki paid bah ka Jylla ki ai ka jingkyrshan ïa ngi, ngin sa thaw ïa ki lad ki lynti ym tang ha ka ïohkam ïohjam jong ki samla bala nang la sted hynrei wat ki bym nang bym stad ruh kumjuh” ula ong.
Ha kajuh ka por, une u Nongïalam ka BJP ula pdiang ïa ka sienjam bala shim da ka Sorkar bad ka kynhun kieng atiar HNLC ban don noh ïa ka jingïakren iasuk.
