Hap ap hadien 15 sngi yn shim rai ban weng ne bteng khang die dohkha

Shillong, Jylliew 12 : Ka Comissioner Food and Safet ba dei ruh ka Deputy Comissioner ka East Khasi Hills, Kong RM Kurbah ha ka janmiet sngi Nyngkong ka la ong ba ka sorkar kan hap ban bishar bniah biang, ha shwa ba kin weng noh ïa ka jingkhang ban die ïa ki dohkha kiba wanrah na shabar jylla.
Haba kren bad ki lad pathai khubor, ka Kong Kurbah ka la pyntip ruh ba ïa katei ka rai kin sa shim hadien ba la kut ki 15 sngi ba ka sorkar ka la khang ban die ïa ki dohkha ba wanrah na shabar hadien ba la lap ba ki don ïa ki formalin lane ki kynja dawai ha kitei ki dohkha. Katkum ka jingong jong ka DC, ka Formalin ka dei kaba buh jingma haduh katta katta ïa ka koit ka khiah jong ki briew.
La ïathuh ruh ba watla na ka liang jong ki, ki la tip naei poi kitei ki dohkha ba khleh formalin, hynrei na ka liang ka sorkar kim pat kwah satia ban pynpaw paidbah.
“Haoid, watla ngi don ïa ka jingtip hynrei ngim pat lah pat ban pynpaw pyrthei ïa ki nongsuplai mynta. Ngin sa phah ïa ka kaiphod sha ka sorkar shen,” ka la ong.
Shuh shuh ka la ong ba hadien ba la weng noh ïa ka jingkhang ban die ïa ki dohkha, ka tnad kan ïai bteng ban leit test ïa ki dohkha kiba wanrah na shabar jylla man ka sngi ban pyntikna ba ki dohkha ki long kiba shngaiñ ban bam da ki nongshong shnong.
Katkum ka jingong jong ka, ka sorkar ka kham peitngor bha ïa ki khabah (Rohu fish) ka jait dohkha kaba bun ki paidbah ka jylla ki bam bha bad kine ki dohkha ki wan na kylleng ka ri India bad dei na kata ka daw ka sorkar kan hap ban peitngor bha wat hadien ba la weng ïa ka jingkhang die ïa ki dohkha ba wan na shabar jylla.
Lah ban kdew hangne ba ka jingpynbna ban khang shwa ïa ka jingdie ïa ki dohkha ba wan na shabar ka la sdang naduh ka 08tarik mynta u bnai.
Shwa kane, na ka liang ki doktor kynthup ïa ka DMHO ka East Khasi Hills, Dr. A Lyngdoh ka la ïathuh ba ka formalin ka ktah haduh katta katta ïa ka koit ka khiah jong u briew ym dei tang ïa kiba bam hynrei wat ïa kiba die ruh ki don ka jingma namar ki ktah ïa ki man ka sngi.
Na ka liang ka Assistand Food Analyst cum Microbiologist jong ka sorkar jylla, Dr. Wadamika Lyngdoh ka la ïathuh ba ka daw ba ki khleh Formalin ka long ban pyntikna ba ka dohkha ba kan ym pyut. Hynrei ka ong pat ba katei ka dawai ka buh pat ka jingma ïa ki briew kiba bam bad wat ïa ka jingim jong ki ruh.
Ha kane ka sngi la ïoh ruh ïa ka jingbatai na ka Superintendent of Fisheries ka East Khasi Hills, Kong Hameka Papang bad ruh ka Assistant Food and Safety Commissioner, Kong DBS Mukhim, ryngkat ka jingdonlang u SP ka East Khasi Hills Bah S Nongtnger bad kiwei kiwei.
Shwa kane la pyntip ruh ba ha ka jingtest ha ka kylla kaba nyngkong, na ki 40 tylli ki dohkha kiba test ïa kiba la shim bad lum nuksa na kylleng ki dukan, la lap ba 32 tylli ki pynpaw ba ki don ïa ka formalin.
Hadien kane, ka Kong Kurbah ka la ong ruh ba kum ka sorkar hi kin pyntikna ba kito kiba donkti ha katei ka kam kin ym lait satia na kti ka aiñ.