Shillong, Naitung 27 : Hana ba pynwit, pyndik bad pynthut palat ki pulit ïa ki nongtrei ne dkhot jongka BJP kumta ka Executive Committee jong kane ka party kaba la long mynta ka sngi ka la rai ban pynlong da ka jingïakhih ba jai jai hangne ha nongbah Shillong bad Tura kum ka dak ban pynpaw ïa katei ka jingpyndik ki pulit jongka West Garo Hills.
Haba kren sha ki lad pathai khubor u bah Earnest Mawrie u la ong ba haka 26 tarik mynta u bnai ki pulit jongka Tura Police Station ki la khot hajir ïa u Wilver M Dango uba dei u General Secretary ka Tura District bad tohkit ïa u haduh hynriew kynta.
U bah Mawrie u la ïathuh hadien ba la kem ïa u Bernard ki pulit ka Garo Hills ki la khot ïa u Dango sha police station ban shim jingthoh na u.Kumta kin sa khot wat ïa kiwei kiwei ki dkhot jongka party ruh ban leh kumjuh ïa kaba ym tip na kaei ka daw ruh.
Kumta ka party mynta ka sngi ka la rai ban pynlong da ka jingïashong kyllaiñ myngngor hangne ha nongbah Shillong bad Tura halor katei ka jing shah pyndik jongu Dango bad kiwei kiwei ki dkhot jongka ha ki pulit ka West Garo Hills.
La ïathuh ba ki pulit ka West Garo Hills bad u SP ki la bthah ïa u Dango ba u dei ban wan mih sha Tura Police Station man la ka sngi bad ki dang don ruh sa kiwei kiba ki pulit ki dang pynkhreh ban khot hajir.
U bah Mawrie u la ong ba kane ka jingshah pyndik bad pynthut jong ki dkhot kala wanrah ka jingnoh mynsiem ha ki dkhot ka BJP hynrei wat la katta ruh ka BJP kan ïeng tylli bad kan ym pyndem ha kane ka jingleh ki pulit.
