Halor saw tylli ki mat pan jingpynshai ka HITO na u Syiem jong ka Hima Maharam Syiemship

By Mawphor Editor On Aug 19, 2025

Mawkyrwat, ‘Nailar 18 : Ka Hynñiewtrep Integrated Territorial Organisation (HITO) jong ka South West Khasi Hills District hapoh ka jingïalam jong u bah Paul Thyrniang, President ka HITO South West Khasi Hills District mynta ka sngi ka la pan jingshai na u Syiem ka Hima Maharam Syiemship halor ki saw tylli ki mat.
Haba kren ha ki lad pathai khubor, u bah Paul Thyrniang, President ka HITO South West Khasi Hills District u la ong ba naduh mynno bad katno ngut ki Myntri ka Hima Maharam ki lah ruh ban long ki nongïalam jong ki seng saiñ pyrthei?
Ym tang kata, na ka liang ka seng ka kwah ba u Syiem ka Hima Maharam un pynshai shwa halor kine ki bynta, bad lada u Syiem u tip ïa ki kyndon aiñ ba la pynkup bor ha u, ka seng kam banse ban leit wad hi ïa kita ki aiñ ban wanrah ha khmat u Syiem ban dup shai u paidbah.
Shuh shuh na ka liang jong ka Hynñiewtrep Integrated Territorial Organisation (HITO) south west khasi hills district, hadien ba ka la ïohi lyngba ki lad pathai khubor, halor ka jingkren jong u Syiem ka Hima Maharam, bad ka Executive Committee ba ka ka don ka jingtyrwa ba kan ai ïa ka khyndew jong ka hima, ka ban kot da ki phew lane spah akar sha ki shipai BSF, na ka liang ka seng ka sngewdei ban ai ka jingkyrshan kaba khlaiñ ïa ka KSU halor kane ka bynta.
Nalorkata, ka seng ka kwah ruh ban ïoh jingshai shwa na u Syiem jong ka Hima Maharam halor ki 4 tylli ki mat; kaba nyngkong ka long kum ka seng ka kwah kylli naduh mynno u nongkitkam jong kawei ka seng saiñ hima sima kaba ïalam ïa ka sorkar, kata u Secretary ka NPP Meghalaya State Unit, u bah Kitborlang Nongrem, bad uba dei ruh u Vice-Chairman ka MGCC u la long u nongaiktien (Spokesperson) jong ka Executive Committee jong u syiem, kaba ar ka long katno ngut ki Myntri kiba don ha ka Executive Committee kiba bat kam ruh kum ki nongïalam saiñ pyrthei?
Kawei pat ka long, hato ki kyndon aiñ jong ka District Council ki treikam ne em ïa une u Syiem bad ïa ki Myntri jong kane ka hima kin ïaleh politik katba mon ïa u paidbah katba mih ki kam? Bad kawei pat ka long ba balei kam shym la don ka jingtyrwa sngewbha sha ka sorkar jylla ha ka por ba ka sorkar ka wad jaka ban buh ïa ka ophis treikam jong ka Ranikor Civil Sub – Division? Ha kaba kiwei ki hima ki la tyrwa ryngkat ki kyndon ba ïa ki kam grade CR&D; pyrkhat shwa ïa ki khun ki hajar jong ki (first preference), bad ki la leh da jingiatip paitbah namar ki la pyrkhat ba ka khamsuk ban ïa pynbeit ki kam ki jam bad ka sorkar jylla, hynrei bad ka Central Government Force ka long tang ka jingïohnong kaba shisien jong ki nongdie, bad kiba bud nangta hadien kin sa long tang ka jingshah pyndik, ka jingshah pynsaja, ka jingshah-bom shah tied klep, bad ka jingshah-siat ïap klep na ka jingtharai sniew jong ki BSF ïa ki paidbah ha ki kam ki duk bad ha ka rep ka riang kumba ka la jia ha kiwei ki jaka ba ki BSF ki don, la ong u President.
Kumta na ka liang ka HITO ka ban biang bda ka kwah ba u Syiem un pynshai shwa halor kine ki mat ba ka seng ka pynsngew, bad lada u Syiem um tip ïa ki kyndon lane ki aiñ, ba la pynkup bor ha u, ka seng kam banse ban leit wad ïa kita ki aiñ ban wanrah ha khmat u Syiem ban ïa pynbeit shwa khnang ba ki paidbah kin ïa shai, namar ka seng ka tip ba katkum ka Notification jong ka KHADC, Dated: Shillong, The: 4th, April, 2023; Kaba la kdew bad batai shai halor kine kine ki bynta, hynrei ka seng hi ka i ba une u Syiem jong ka Hima maharam u la pynkheiñ lut ïa kaba kum ka seng kam sngewtynnad.
Kumta, ka HITO lyngba u President ka kyntu ïa u Syiem ba un pynshai shwa ïa kine ki jingkylli ba ka seng ka la buh hashwa ban ïa kren ïa kiwei kiwei ki kam bad kumba la ong hakhmat ba kin ai ïa ka jingkyrshan kaba khlaiñ ïa ka KSU ban pyrshah halor ka jingthmu une syiem ban die shibun bah ka khyndew sha kiwei pat ki bor kiba nabar ka hima bad kum ka seng kan ïaleh bad kan ïai ïaleh lada poi ha uno uno u pud.