Mawkyrwat, Nailur 05: Ka Hynñiewtrep Achick National Movement (HANM) jong ka South West Khasi Hills District mynta ha ka sngi la ïoh ban ai ïa ka jingthoh ne dorkhas ha u Symbud Myntri Rangbah jong ka Jylla Meghalaya, bah Prestone Tynsong halor ki san tylli ki mat jingdawa jong ka jaidbynriew bad ka roi ka par jong ka dong ka thaiñ.
Hadien ba la aiti ïa ka dorkhas, u Lambokstar Marweiñ, President ka Hynñiewtrep Achick National Movement (HANM) jong ka South West Khasi Hills District haba kren ha ki lad pathai khubor u la ïathuh ba ka seng lyngba u Symbud Myntri Rangbah jong ka Jylla Meghalaya ki la phah ïa ka jingthoh bad pynpaw ïa ki san tylli ki mat jingdawa kita ban pynïoh ïa ka ILP ha shwa ka Election 2023 na ka Sorkar India, ban kren lem hapoh Assembly ban khang pyrshah ban tih ïa u Uranium, ban plie noh ïa ka shispah (100) jingthiah hapoh South West Khasi Hills District, Mawkyrwat, ba dei ban pynbiang ïa ki lynti synkien ha ki Shnong nongkyndong jong ka South West Khasi Hills District namar u bah Prestone Tynsong u dei kum u Myntri ba dei peit ïa ka tnad PWD (R), bad ban pynkiew noh ïa ka PHC Mawthawpdah sha ka CHC.
Namarkata, u la ong ba lyngba ka jingïakynduh jong ki ïa u bah Prestone Tynsong, Symbud Myntri Rangbah jong ka Jylla Meghalaya kan long ka jingkyrmen ba na ka liang ka sorkar kan sa leh ïa kaba donkam namar kine ki jingdawa kim dei shuh kiba dang thymmai hynrei ki dei kiba la ju ïa dawa na kawei ka por sha kawei pat.
Ha kane ka sngi ïa u President jong ka seng la synranlang da ki nongkitkam jong ka Hynñiewtrep Achick National Movement (HANM) jong ka South West Khasi Hills District.
