Shillong, Ïaiong 05 : Ka Department of Information Technology jong ka Martin Luther Christian University (MLCU) ka la pynlong da ka jingïalang ha ka shnong Khliehasem ban ai jingpynshai ïa ki nongshong shnong halor ka jingktah jong ka bor social media ha rta bapher bapher.
Ïa kane ka prokram la lamkhmat da ki samla pule 4th semester BCA halor ka phang, “Ka Social Media bad ka Jingïoh bynta jong ka ha ki pateng bapher bapher”.
Na ka liang ki samla pule ki la ïoh ban syllok bad ki nongshong shnong bad pynshai ruh ha ki ïa ki jingmyntoi bad kumjuh ïa ki jingktah kiba mih na ka jingwan jong ka social media. Ki la pynshai na ka jingwan ka social media la ïoh ban pynkhlain shuh shuh ïa ki lad ai jingtip bad kumno ban ïoh jingtip bad khamtam eh kumno ban ïakhun ïa ki jingtip kibym dei.
La pynsngewthh ruh halor ka jingkyrni bad ruh halor ka jingktah ïa ka jingim ba man ka sngi jong ki samla, kiba la rangbah bad wat kiba la noh ka rta.
Ban pynsngewthuh shuh shuh ïa ki paidbah, ki samla pule ki la pyni ruh da ka skit kaba pyni ïa ka jingim kaba man ka sngi halor ka jingktah jong ka social media. Kane ka skit ka la ai ïa ka khubor kaba khlain bha halor ka jingpyndonkam ïa ki kor ki bor digital bad ruh kumno ban pyndonkam ïa ki.
Katkum ka kyrwoh na ka MLCU la ong ruh ba ka thong jong kane ka prokram ka long eh ruh ban pynpaw ïa ka jingbteng jong kane ka skulbah ban don bynta ha ka imlang sahlang nalor ba ka plie lad ruh ïa ki samla pule ban ieng ha ki rynsan ban pynshai sha ki paidbah.
Ka prokram ka la kut da ka jingïatai bad ka jingpynshai ha kaba ki nongshong shnong ruh ki la pynpaw lang ïa la ki jingsngewbha kaba la pynlong ïa ka prokram ba kan long kaba shongkun bad ai jingmyntoi ïa baroh.
