Halor ka projek lynti Rel, donkam ban ïasyllok ïar bha ban myntoi lang baroh: DP Wahlang

Shillong, Nailur 29: U chief secretary u ban shongthait noh u Bah DP Wahlang ha ka sngi Nyngkong u la ong ba ka jingtyrwa ban pyntreikam ïa ka railway project ne ka projek rel ka donkam ïa ka jingïasyllok kaba ïar bha bad baroh ki nongshong shnong ban pynthikna ba kano kano ka rai ka dei ban long ka jingmyntoi ïa baroh.
Katkum ka jingong jong u, dei tang ka sienjam kaba thikna kaba lah ban shim hadien ba la pynmynjur ïa baroh ki kynhun kaba dei ruh ka jinglong jingman kaba ïa jop bad jop lang.
“Ka Railway ka dei ka kam kaba ngi donkam ban don bun ki jingïasyllok bad baroh ki nongshong shnong bad shisien ba baroh ki la tip ba la ka dei ka jinglong jingman ha kaba baroh ma ngi sa shisien pat bad ba baroh ki la ngeit ba ka dei ka jingjop lang jong baroh, kumta ngi lah ban shim ka sienjam kaba thikna halor kane ka kam kaba sngewkhia,” ïathuh u Bah Wahlang.
Halor ka kam ba jur ka dheng kali, u Bah Wahlang u la ong ba kam don kano kano ka rai kaba lah ban neh skhem halor ki jingeh ka kam dheng kali khamtam ha Shillong.
U pyntip ba ka sorkar ka la wanrah ruh ïa ki rukom pyrkhat kam kiba lyngkot (short-term), kiba longpdeng (medium-term) bad kiba jrong (long-term) ki rukom pyrkhat kam ban pynbeit ïa kane ka kam.
U Wahlang u la ong ba ka sorkar ka la shna bun tylli ki jaka pynïeng kali ban pynduna ïa ka dheng kali ha ki surok nalor ka jingïatreilang bad ki dorbar shnong ban pyntreikam ïa ki jaka ïeng kali ha ki katto katne ki jaka.
Ka la don ruh ka rai ban pynlong marjot noh ïa ki kali rim ha kaba kane kan ïarap ban pynduna ïa ka jingdon ki kali kiba ïaid ha ki surok.
Kiba bun ki projek surok ba thymmai kum ka Western Bypass, High-Speed Corridor, bad Tura Bypass, la dep ban mang ban pynsuk ïa ka leit ka wan ban lait na ka dheng kali.
“Kadei ka jingeh kaba hap shim ïa ka por ban pynbha. Kam don kano kano ka rai kaba lah ban leh kyrkieh ne leh kloi. Ngi hap ban long kiba ïaishah. Peit ïa ka jingdon ki kali kiba la register ha ka shisngi, ka la kiew sha ki spah mynta haba nujor ha ki 3-4 bad ha ki 20 snem mynshwa. Kumta ngi hap don ka rukom pyrkhat bad nga thikna ba ngin sa ïohi ïa ka khana kaba bha ha kawei ka sngi.”
U Bah Wahlang u la pynpaw ïa ka jingkwah jong u ban lah ban leh kham bha bad ban pynbeit haba ïadei bad ka jingeh ka Wah Wahumkhrah. U la pynpaw ïa ki jingpyrshang kiba la leh ban pynbha ïa ka jinglong ka wah bad ban pynitynnad ïa kane ka thaiñ bad ong ba ka sorkar ka la dep ban shong bun ki jingïalang bad ki shnong ban pynbeit ïa kane ka kam.
U la ïathuh ba ka la don katto katne ka jingpynbha ïa ka jinglong jong ka um, kumba la test da ka Pollution Control Board, da kaba bynrap ba ki kam ki la nang ïaid ban pynitynnad ïa ka thaiñ ba la khmih lynti ban pyndep hapoh ka shisnem.
Halor ki kam jong u drok, u Bah Wahlang u la banjur halor ka jingïasyllok kaba jrong kaba kynthup ïa ki shnong bad ki nongshong shnong.
U la ong ba ki pulit ki la don la ki jong ki anti-drug squad kiba trei ban ïakhun ïa kane ka kam. “Ngi hap ruh ban peit ïa ka DREAM project kaba la thaw mynta la 2 snem shiteng ban khmih bad pynbeit ïa kane ka kam.”
U la ïathuh ba ka sorkar ka la kyntiew ruh ka jingdon jong ki drug rehabilitation center.
U Bah Wahlang u la banjur ruh halor ka jingdonkam ban ïatreilang bad ki shnong, ki seng jong ki Balang, bad kiwei ki nongshong shnong bad ki riew shemphang ban pynbeit ïa kane ka kam, “Tang ban shu bat ne kem ïa ki nongkhaïi drok kan ym pat dei ka rai kaba biang,” u la ong.