Shillong, Jymmang, 28: Lada ngi ïakren ïa ka jingkoit jingkhiah jong ki kynthei, kaei ka rta kaba biang ban shim jingsumar bha? Hato ka dei naduh dang khynnah ne hadien ba la samla ne ha ka por ba ki kha ki pun? Kine ki dei ki jingkylli kiba la pynsngew jong ki nongïashim bynta ha ka jingïathir halor ka jingkoit jingkhiah jong ki kynthei kaba la long dang shen ha Assam, Administrative Staff College, Guwahati.
Ïa kane ka jingïathir la ïathir halor kane ka phang la pynlong ka National Commission for Women (NCW) ryngkat ka jingïatreilang bad ka Assam State Commission for Women (ASCW) bad ka Women and Child Development (WCD) Department, ka sorkar Assam.
Ha kane ka jingïathir la ïoh ïa ka jingkren na ka dkhot ka National Commission for Women ka kong Delina Khongdup kaba dei na ka jylla Meghalaya, nalor u Keshab Mahanta, u myntri ka tnad ka koit ka khiah ka sorkar Assam, u Principal Secretary ka tnad ka koit ka khiah ka Assam, ki nongmihkhmat na ki jylla, na ka tnad Social Welfare, na ka tnad ka koit ka khiah jong ki 6 tylli ki jylla ka dong shatei lammihngi ka India.
“Ka jingkoit jingkhiah kam dei tang ïa ka met hynrei ïa ka jabieng ruh kumjuh. Ka kmie kaba koit kaba khiah ka dei ka longïing kaba koit ka khiah”, la ong ka Kong Delina.
Ka la ong ruh ba ki kynthei khamtam ki longkmie ha ka thain shatei lammihngi ki ïakynduh shibun ki jingeh kum ka jingngop ki longkpa ha ki jingsniew ha ka kyiad, ki khun shynrang, ka jingri tnga bun u shynrang, ka jingbym don ka hok longtrai ïa ka spah, nalor ki jingpang ba bun jait khamtam ka jingduna snam na ka jingbym biang ka bam ba tei.
Ka la ai jingmut ban don ka jingpynshai paidbah halor ki jingeh ba ïakynduh ki longkmie, ban leit phah peit man ka por ïa ka jingkoit jingkhiah, ban bam ki jingbam ba tei met, ban ai jinghikai bad kiwei kiban kyntiew ïa ki kynthei.
Nalor kine, la wan ïashim bynta ruh ki nongmihkhmat na ki kynhun bapher bapher kynthup na ki ophisar na ki district jong ki tnad sorkar bapher bapher ka sorkar Assam, ki riew pule, ki samla pule, ki nongmihkhmat na ki seng ba kyrshan ka UN, ki nongmihkhmat na ki seng treimon sngewbha kynthup ki ASHA, ki nongtrei Aganwadi bad kiwei.
Ki nongkren khamtam na ka dkhot ka Commission, ka kong Delina ka la pynsngew ïa ki jingdonkam ban sumar ïa ki kynthei ym tang ïa ka jingkoit jingkhiah ka met ka phad hynrei ka jingkhlaiñ jong ka bor jabieng ruh kumjuh bad kiwei pat ki mat kumno ban pynweng ïa ki jingeh ba ïadei bad ki kynthei.
