Halor ka jingthung Agent ïa u Sevenborn Tang, dei ban phah da ka jingthoh: HITO
Da ka Signature Campaign yn pynlong ka HITO
Jowai, Naitung 17: Ka Hynñiewtrep Integrated Territorial Organisation (HITO) mynta ka sngi haka jingkren sha ki lad pathai khubor kala dawa na ka Secretary, Executive Committee jong ka Jaiñtia Hills Autonomous District Council (JHADC), ba kan pynshai daka jingthoh naduh mynno la thung Agent ïa u Sevenborn Tang ban pynïaid ïa ki Weight Bridge Cum-Forest Check point ka Council.
Na ka liang u Co-founder ka seng u bah Lawyerson War ula ong ka jingpynshai jong ka JHADC lyngba ki lad pathai khubor hynnin ka sngi kam long kaba shai katkum ka RTI bala ïoh pdiang da ka seng.
Kumba long mynta ka jingbamsap (corruption) hapoh ka Council ka long kaba jur bha haduh katta kata, kumta ka seng HITO kan khot pynlong da ka ‘Signature Campaign’ ïa ka tarik yn sa pynbna ha ki sngi ban wan hadien bala ïoh jingbit (permission) da kaba kyntu ïa baroh ki paidbah napoh ka Ri-Lum Jaiñtia ban wan ïasnohkti lang.
‘Ka District Council mynta ka ong ba ka shem jingeh bha ban siew tulop ïa ki nongtrei namar ka jingduna Fund, hynrei kine baroh dei namar ba kim nang ban pynïaid ne pyndonkam ïa ka rukom pynmih pisa na ka bynta ka Council, la ong u ma Lawyerson War.