Nongpoh, Nailur 24: Ka Hynñiewtrep National Youth Front (HNYF) Northern Region ryngkat ka jing ïa trei lang bad ka HNYF Pahammawleiñ Circle ha ka 23 tarik u Nailur 2022 kala shim ïaka sienjam ban pynlong da ka prokram ai jinghikai ha Pahammawleiñ halor ka jingma u drok bad ki jingdih buaid bad ka shongkha khynnah ha kane ka juk ba mynta ba bun naki samla ki ngop bad hap ban pep skul shiteng por.
Ha katei ka prokram ai jinghikai la wan ruh ban don ryngkat da ki heh pulit ka Ri-Bhoi naduh u Bah S Pasleiñ DSP Headquarter, Bah DSR Lakiang Incharge Nongpoh Traffic, ka Samla Batemon Pamshong Clinical Psychologist DMHP Ri-Bhoi District kaba la wan ban ai jinghikai ba bñiah halor ka jingma ka shongkha khynnah bad ka jingdih buaid kaba lah ban ktah ïaka koit ka khiah, u Bah Markus Marten President ka HNYF Northern Region haka jingdon lang ki khynnah skul, ki nonghikai bad ki paidbah na katei ka shnong.
Haba kren ha katei ka sngi naka liang ka Samla Batemon Pamshong kaba dei ka Clinical Psychologist kala ai ka jinghikai kaba bñiah halor ka jingma jong ki jingdih buaid naduh u drok, ka kyiad, ki biri sikret kiba lah ban ktah ïaka koit ka khiah bad wat ïaka pyrkhat pyrdaiñ namar katei ka jingpang shisien bala kyrni ka long kaba eh ban bthat bad bunsien kum ki samla ki ngop ha katei ka jingpang kaba eh pat ïaki jngai khamtam u drok u ba la sdang ban kynrei ha kylleng ki jaka haka dong Ri-Bhoi kaba lah ban buh jingma ïaki khun samla kiba lui lui.
Kala buh ruh ka jingkyrpad ïaki khun samla naduh ki khynnah skul ha katei ka sngi ba ki dei ban phikir ïala ka jong ka koit ka khiah bad kiar na kaba pyndonkam ïaki jingbam ba sniew, ki jingdih buaid kiba lah ban ktah ïaka koit ka khiah bad pynduna wat ïaka jingim.
Ka ai jingkren ruh ha katei ka sngi da u Bah S Pasleiñ DSP Headquarter ba kum u heh pulit u la ïathuh ba u drok u la kynrei bha ha Ri Bhoi bad ka dei ka jingstad jong ki samla ban jied ïa kaba bha ne kaba sniew bad kim dei ban ngop haki jingpynshoi hynrei ban kiar lai lum lai wah ban lait na ka tyrsim u drok.
Na ka liang ka seng HNYF ha katei ka sngi kala sam ruh ïaka khusnam Tirot Singh Award sha uwei naki samla Rangbah jong ka shnong Pahammawleiñ u Samla Paul Wahlang u ba la don bynta ban rat dieng khong ïa u drok ha katei ka thaiñ bad khamtam ha u snem bala leit noh utei u samla u la ioh ban bat bad kem ïa u drok ba shongdor palat 3 klur ba thmu shalan sha ka jylla bad bala aiti noh sha ki bor pulit.
