Halor ka jingkhlad u dkhot ka ACHIK, dawa kyndang naphang ka CoMSO ïa kiba sah beain
Shillong, K’Lyngkot 11: Ka Confederation of Meghalaya Social Organisations (CoMSO) kala pynrem jur ïa ka jingjia kaba la jia ha ka 9 tarik ha West Garo Hills District kaba la lam sha ka jingduh ïa ka mynsiem ba kordor jong u wei na ka jaitbynriew Garo bad kane kala paw paidbah ïa ka jingbym lah ban teh lakam ban wan ïa ka shongsuk shong sain bad ban ïada ïa ki trai ri trai muluk.
Kane ka jingjia kam dei ka mat jingtrei kam ha la ka jong, hynrei ka dei beit na ka jingmih bym lah ban peitngor bha ïa kiba wan buhai shnong beain da ki snem bad ka jingtih beain ha ki par maw shun bad ka jingbym shimkhia ki bor ba dei khmih.Wat lada ka jingmaham ba bunsien na ki seng bhalang hynrei ym shym la khein snep ïa ki bad kane kala buh ïa ki trai ri trai muluk ha ka jingma bad ka jingbym shngain.
Na ka liang jong ka CoMSO ka dawa na ka sorkar Meghalaya ba mardor kadei ban lap bad kem mardor ïa ki bad ban pynshitom tyngeh katkum ka ain ïa kiba donkti baroh khlem da pynslem shuh bad khlem da ïada ïano ïano hapoh ka jingkdup jong ka saiñ pyrthei ne ka ïada na ki bor synshar.
Shuh shuh, ka CoMSO ka dawa jur ban kyndang noh mardor ïa baroh ki nong wan shong shnong beaiñ kiba la ithuh ha ki jaka ba shah ktah, katkum ka aiñ, khlem da pynslem bad khang lut ïa baroh ki jaka tih maw beaiñ kiba treikam ha kaba pynkheiñ ïa ki aiñ jong ka mariang, ka khyndew, bad ka jingtih mawshun, bud sa ki nongleh be-aiñ, ki nongleh kam sniew.
Ka jingbteng ban ïa shah ïa ki nongshong shnong beain bad ki kam tih mawshun beain ka wanrah ïa ka jingkharoi ki briew, ka wanrah jingma kylla ha ka imlang sahlang, bad ka jingshngain jong ka Meghalaya.
Ka CoMSO ka maham ba ka jingbym leh ei ei mynta kan pynshlur tang ïa ki briew kiba wan be-aiñ bad kan pynduh shuh shuh ïa ka jingshaniah jong ki paidbah ha ki tnad treikam jong ka Jylla. Ki paidbah ka Meghalaya ki peitngor bha, bad kin nym shu sngap jar kum ki nongpeitkai katba dang ailad ïa ki kam be-ain ban roi.
Kane ka long katkum ka kyrwoh khubor ba la pyllait da u Bah R.K. Synrem, Chairman ka Confederation of Meghalaya Social Organisations (CoMSO).