Halor ka jingjia bad ki kam ba bha, ai khublei kyrpang u kñi ïa la ka khun pyrsa

Mawkyrwat, Ïaïong 26: Ka long kaei kaei ka kam kaba lah ban ai mynsiem na ka bynta kiwei pat ki para khynnah kynthei kiba don ka mynsiem ban ïarap lem ïa kiwei kiba donkam ki jingïarap ba kyrkih, ha kaba kawei na ki khynnah samla na ka shnong Mawkyrwat, South West Khasi Hills District kaba ha ki karta 14 snem ka la ïoh ban pyllait im ïa uwei u khynnah uba la jan ngam jyllop.
U bah Tanbor Lyngdoh Marshilong ha ka kyrwoh khubor ba la u phah, u la pynpaw ka jingaikhublei kaba kyrpang na ka bynta ka Ridondor Lyngdoh Marshilong kaba dei ka khun pyrda jong u. U la pynpaw ruh ba haba u kylli ïa i Ridondor Lyngdoh Marshilong, ïa ka jingjia ba la jia ha wah (Photumnew) u la ong ba ka long kaei kaei kaba sngewma bad sngewtieng namar da ka khynnah kynthei kan leit ïarap ïa u khynnah shynrang ka la long kaba eh bad artat ula kham heh shibun ban ïa i.
Ha kaba ïa dei bad ka jingjia, u la ïathuh ba dei ha 26 tarik bnai Lber, 2022 i la leit sha katei ka wah bad la i mei-ieit ban leit saitjaiñ, bad don ruh bun ngut hangta kiba ïa saitjaiñ lang, bad i la ïathuh ba hangta ki don ar ngut kiba ïa jngi bad kita ki dei ki khynnah shynrang uwei uba khamrit u nangbha ban jngai, hynrei uta uwei um da nang bha ban jngi hynrei ula noh ha um bad u la poi shaba jylliew bad ula ïa ksaid ban pyrta briew um lah ba ka um ka la dap ha shyntur, bad ïohi satang ïa ki shynriah kti, bad kiba saitjaiñ hangta ki la ïohi ïa kata ki la hala ‘ama to rap…’
Shuh shuh la ïathuh ruh ba uta u khynnah u ba jngi lang u la leit ban ïarap ïa u hynrei umlah namar ba u dang khynnah palat, hangta i Ridondor i ong ka la isynei palat, i ong ba i noh la ka noh, bad i la shim na ki shynriah kti bad thmu ban bah ha ka met hynrei i la ngam lang ba u khia namar ba u la kham heh shibun ban ïa i. Ha kata ka por i ong ba i kynmaw Blei “Ah! Blei ïarap ïa nga” bad i la jngi haduh ban da poi ha jaka saitjaiñ, bad kita kiba ïadonlang ki la pynthiah ïa u ha jrong jong kata ka jaka saitjaiñ, bad ki la pynkhem syrpai syrput bad la mih ka um hynrei um tip briew shuh bad khlem pynslem ki ïa rah noh sha jaka sumar ha CHC Mawkyrwat ban ïoh jingsumar ba biang. I Ridondor i la ïathuh ba i leit jngoh ïa u ha jaka sumar ha ka janmiet hynrei um pat tip briew bad i ong ba u tip briew hadien 6 baje janmiet.
Kum u kñi jong i Ridondor u ai khublei ruh ïa ka KSU jong ka Mawkyllut Unit ba ki la ai jingïarap bad leh bha ïa i, da kaba ai ïa ka khusnam ne Award kum ka dak jong ka jingpynshlur ïa i ba in nang don ka mynsiem jong ka jingïarap ïa ki para briew.