Shillong, Rymphang 24 : Ka MLA jong ka Gambegree constituency, Dr. Mehtab Chandee A Sangma ka la buh jingkylli ha Iing Dorbar halor ka jingtreikam jong ki Training Centre jong ka tnad Veterinary khamtam haba bun na ki nongshong shnong jong ka Gambegre ki im ha ka ri jingri.
Haba jubab halor kane, u Myntri Rangbah ka Jylla Conrad K Sangma uba dei ruh u kurim jong ka, u la ong ba kane ka dei ka mat kaba khia bha bad na ka liang ka sorkar ruh ka la shimkhia ban peit ïa ka jingduna ki nongtrei ha kine ki centre.
“Ngin pyntikna ba ïa ki kam kiba lait dei ban pyndap noh mardor,” u la ong.
Kham ha shwa, u Myntri Rangbah u la kular ruh ha Iing Dorbar ba ka sorkar kan pynstet na ka bynta ban don noh ïa ka Veterinary College, ar tylli ki Fishery College bad ka Dairy College kaba la tyrwa naduh u snem 2022.
Haba ïadei pat bad ka jingslem ban pynkhreh ïa ka detailed project reports (DPRs) u Conrad u la ong, “Ka kham slem namar ka jingpynlut ruh ka la bun bha, ngi donkam haduh 334 klur na ka bynta ban tei ïa ka Veterinary College bad 800 akar ka jaka la ïoh ha Kyrdemkulai ha Ri Bhoi, 19 tylli ki tnad ki la tyrwa,” ula ong da kaba bynrap pat ba ki pyrshang katba lah ban pynstet ïa ka kam.
